«Taza Qazaqstan»: Oblys ákimi jańa qoqys shyǵarý tehnıkalarymen tanysty
AQTAÝ. KAZINFORM — Búgin, 15 jeltoqsan kúni Mańǵystaý oblysynyń ákimi Nurdáýlet Qılybaı Munaıly aýdanynda «Zero Waste Aktau» JShS-niń turmystyq qatty qaldyqtardy jınaý jáne shyǵarý úshin arnalǵan jańa arnaıy tehnıkalarynyń tanystyrylymyna qatysty.
Іs-shara barysynda Aqtaý qalasynyń ákimdigi men «Zero Waste Aktau» JShS arasynda qaldyqtardy jınaý jáne shyǵarý qyzmetin jańǵyrtýǵa baǵyttalǵan kelisimshart jasalǵany aıtyldy. Kelisim aıasynda qala aýmaǵy zamanaýı eýro-standartqa saı konteınerlermen jáne arnaıy tehnıkalarmen kezeń-kezeńimen jabdyqtalyp jatyr.
Tanystyrylymda 2025 jyly satyp alynǵan «Dongfeng» markaly 25 qoqys tasymaldaý avtokóligi jáne kólemi 1,1 tekshe metr bolatyn 2100 dana eýro-standarttaǵy konteıner usynyldy. Sońǵy úlgidegi avtokólikter turmystyq qatty qaldyqtardy jınaý, nyǵyzdaý jáne tasymaldaýǵa arnalǵan, joǵary júk kótergishtigimen, únemdiligimen jáne qaladaǵy qarqyndy jumysqa beıimdiligimen erekshelenedi. Al tyǵyz jabylatyn qaqpaǵy bar konteınerler qaldyqtardy jınaý protsesin ońtaılandyryp, jaǵymsyz ıistiń taralýyna jol bermeıdi. Qazirgi tańda 400-ge jýyq konteıner ornatylǵan, jyl sońyna deıin 2100 konteınerdi tolyq ornatý josparlanyp otyr.
Oblys ákimi óz sózinde qaldyqtardy basqarý júıesin jetildirý óńirdiń ekologııalyq qaýipsizdigi men turǵyndardyń ómir sapasyn arttyrýǵa baǵyttalǵan mańyzdy qadam ekenin atap ótti.
Aıta keteıik, jańa tehnıkalar Qazaqstanda qurastyrylǵan jáne «Jasyl damý» ulttyq jobasy aıasyndaǵy ınvestıtsııalyq joba sheńberinde satyp alynǵan. Joba qaldyqtardy basqarý júıesiniń tıimdiligin arttyrýǵa jáne ekologııalyq qaýipsizdikti qamtamasyz etýge baǵyttalǵan.