«Taza Qazaqstan»: MNU-da jańa gúlzardyń qurylysy bastaldy
ASTANA. KAZINFORM — Maqsut Narikbayev University-de (MNU) jańa gúlzardyń qurylysy bastaldy.
Abattandyrý jumystary «Taza Qazaqstan» jalpyulttyq aktsııasy aıasynda júrgizilip jatyr.
Búgin MNU stýdentteri, oqytýshylary men qyzmetkerleri qalalyq senbilikke qatysyp, aǵashtar otyrǵyzdy. Іs-shara Astana qalasy «Nura» aýdanynyń ákimdigimen birlesip uıymdastyryldy jáne gúlzarǵa aınalatyn Femıda alańyn qaıta jóndeý jumystarynyń bastalýy mańyzdy oqıǵa boldy.
— Maqsut Narikbayev University Memleket basshysy Qasym-Jomart Toqaev bastamashy bolǵan «Taza Qazaqstan» jalpyulttyq aktsııasyn qoldaıdy jáne birqatar ekologııalyq is-shara ótkizedi. Búgin qalalyq senbilik kúni biz aǵashtardy otyrǵyzyp, ýnıversıtet aldyndaǵy gúlzardyń qurylysyn bastadyq. Jańa gúlzar elordanyń kórikti jerleriniń biri jáne jas urpaq úshin tartymdy oryn bolatynyna senimdimin. Bul bizdiń jaıly qalalyq ortany qalyptastyrýǵa qosqan úlesimiz, — dedi MNU basqarma tóraǵasy Talǵat Nárikbaev.
Talǵat Nárikbaev atap ótkendeı, qurylys jumystaryn osy jyldyń shilde aıynda aıaqtaý josparlanǵan. Qaıta qurý jáne kógaldandyrý boıynsha aýqymdy joba shamamen 200 aǵash, 10 myńnan astam japyraqty jáne qylqan japyraqty butalar jáne 2 500-ge jýyq ósimdikter otyrǵyzýdy qamtıdy. Sonymen qatar, is-sharalar ótkizýge jáne demalýǵa arnalǵan alań men kovorkıng aımaǵynyń paıda bolýy, shaǵyn arhıtektýralyq nysandar men oryndyqtar ornatylýy, kógal tóseý qarastyrylǵan.
— MNU-men «Nura» aýdany tyǵyz jumys istep jatyr. Sizderdiń bastaýynyzben osyndaı gúlzar ýnıversıtettiń aldynda abattandyrylyp, kógaldandyrylyp jatyr. Jobaǵa qaraǵanda sizdiń gúlzar qalamyzdyń eń úzdik gúlzarlarynyń biri bolady. Soǵan biz de senemiz. Birlesip qalamyzdy taza jáne jasyl qylaıyq, — dedi Astana qalasy «Nura» aýdanynyń ákimi Rıshat Turdybekov.
Aıta keteıik, abattandyrýdyń jalpy aýdany shamamen 11,4 myń sharshy metrdi quraıdy.
Buǵan deıin Aqmoladaǵy Zerendi demalys ornynan bir tonna qoqys shyǵarylǵany habarlandy.