Taza Qazaqstan: Memlekettik orman qory aýmaǵynda 1 mlrd 369 mln kóshet otyrǵyzyldy

ASTANA. KAZINFORM — «Taza Qazaqstan» aıasynda memlekettik orman qory aýmaǵynda 1 mlrd 369 mln kóshet otyrǵyzyldy. Bul týraly Ekologııalyq mádenıet jáne saıasat departamentiniń dırektory Dáýlet Esmaǵambetov aıtty.

— «Taza Qazaqstan» bastamasynyń taǵy bir negizgi baǵyty — kógaldandyrý jáne eldiń orman qoryn arttyrý. Máselen, memlekettik orman qory aýmaǵynda 1 mlrd 369 mln kóshet, onyń ishinde Aral teńiziniń qurǵaǵan túbine sekseýil kóshetteriniń 48,7 mln danasy otyrǵyzyldy. Ótken jyldyń sońynda Qazaly qalasyndaǵy 33 gektar alańda qýattylyǵy jylyna 3 mln kóshet bolatyn orman pıtomnıginiń qurylysy aıaqtaldy. Pıtomnıkte agrotehnıkalyq talaptardy eskere otyryp, 10 gektar alańda sekseýil tuqymy egildi, — dedi ol Ortalyq kommýnıkatsııalar qyzmetindegi brıfıngte.

Onyń dereginshe, bıyl aýdany 15 gektar pıtomnıkti jobalaý jáne Araldyń qurǵaǵan tabanynda tikeleı uńǵymylardy burǵylaý jumystary júrgizilip jatyr. Qyzmetkerler úshin óndiristik modýlder jetkizilgen.

— Ózderińizge málim, Úkimet pen mınıstrliktiń «Taza Qazaqstan» bastamasy aıasynda qabyldanǵan sharalary ekologııalyq sanany ózgertýge áser etýde. Іs-shara aıasynda el azamattary tazalyqty aýlasynan, óńirinen bastap, jalpy el ekologııasyn jaqsartýǵa úles qosýda. Byltyr tujyrymdama aıasynda ótken aktsııalarǵa árbir úshinshi qazaqstandyq qatyssa, bıyl kórsetkish odan da joǵary bolady dep senemiz, — dedi Dáýlet Esmaǵambetov.

Aıta keteıik, jyl basynan beri «Taza Qazaqstan» bastamasy aıasynda 934 ekologııalyq is-shara ótkizildi.