«Taza Qazaqstan»: mektepterde sý únemdeý mádenıeti qalyptasyp jatyr
ASTANA. KAZINFORM — Qyzylorda oblysynda júzege asyrylyp jatqan «Sý jáne bilim» jobasy aıasynda 55 bilim berý uıymynan 67 myńnan astam bala men jas qamtyldy.
Memleket basshysy Qasym-Jomart Toqaevtyń bastamasymen júzege asyrylyp jatqan «Taza Qazaqstan» jalpyulttyq ekologııalyq baǵdarlamasy aıasynda bilim berý uıymdarynda ekologııalyq mádenıetti qalyptastyrý jáne tabıǵı resýrstardy uqypty paıdalanýǵa tárbıeleý baǵytyndaǵy jumystar jalǵasýda.
Qyzylorda oblysynda júzege asyrylyp jatqan «Sý jáne bilim» jobasy aıasynda 55 bilim berý uıymynan 67 myńnan astam bala men jas qamtyldy. Jobaǵa 1 773 pedagog tartylyp, 2 843 ınteraktıvti sabaq ótkizildi, 55 mekteptik sý klýby qurylyp, 4 876 ekologııalyq bastama iske asyryldy.
Joba nátıjesinde qatysýshylardyń sýdy únemdeý máseleleri boıynsha bilim deńgeıi 48,8%-dan 93%-ǵa deıin artty. Pedagogterge ádistemelik qoldaý kórsetý maqsatynda 17 taqyryptyq bólimnen, ınteraktıvti tapsyrmalar men praktıkalyq materıaldardan turatyn «Sý sandyǵy» bilim berý resýrsy ázirlendi.
29–30 qazanda Qyzylorda qalasynda bilim berý arqyly ekologııalyq mádenıet pen sýdy únemdeý daǵdylaryn qalyptastyrýǵa arnalǵan respýblıkalyq semınar ótýde. Oǵan elimizdiń 20 óńirinen bilim berý salasynyń 250-den astam ókili qatysyp jatyr.
Semınar barysynda qatysýshylar ozyq bilim berý tájirıbelerimen almasyp, oqýshylardyń zertteý jobalaryn, sý únemdeý tehnologııalary men ekologııalyq bastamalardy tanystyrýda. Qyzylorda oblysynyń tájirıbesin elimizdiń basqa óńirlerine taratýǵa jáne mekteptik sý klýbtarynyń jelisin keńeıtýge erekshe nazar aýdarylýda.
Aıta ketelik 2030 jylǵa qaraı sý únemdeý tehnologııalary qoldanylatyn alqaptar 1,3 mln gektar bolady.
