«Taza Qazaqstan»: Mańǵystaýda jyl basynan beri 10 myń tonnaǵa jýyq qoqys shyǵaryldy
AQTAÝ. KAZINFORM – Memleket basshysynyń bastamasymen qolǵa alynǵan «Taza Qazaqstan» ekologııalyq aktsııasy aımaqta byltyrdan beri turaqty túrde ótkizilip keledi. Sharaǵa jergilikti halyqtyń belsendiligi joǵary. Oblystyq tabıǵı resýrstar jáne tabıǵat paıdalanýdy retteý basqarmasynyń málimetinshe, jyl basynan beri aktsııaǵa 40 myńǵa jýyq adam qatysqan. 800 den astam tehnıka jumyldyrylyp, 10 myń tonnaǵa jýyq qoqys shyǵarylǵan.
Oblysta «TAZALIKE» FEST 2025 is-sharasy aıasynda senbilikter, aǵash otyrǵyzý, joǵary oqý oryndarynda eko-saǵattar, jer saǵaty, eko-chellendjder ótkizildi. Sonymen qatar, «Úlgili aýyl» jobasy konkýrsyn aǵymdaǵy jyldyń tamyz aıynda ótkizý josparlanǵan.
- «Taza qala» aktsııasy aıasynda senbilik jumystary júrgizildi. Oǵan 5720 adam qatysyp, 1457 túp aǵash otyrǵyzyldy jáne 300 tonna qoqys shyǵaryldy. «Jer Saǵaty» aktsııasy aıasynda 39 064 kóshe shamy sóndirilip, 28639 kVt/s elektr energııasy únemdeldi. «Taza kásip – taza aımaq» aktsııasyna 320 adam qatysyp, 160 túp aǵash otyrǵyzyldy, - delingen basqarmanyń resmı habarlamasynda.
Budan bólek, aımaqta «Taza sý qoımalary», «Tazarý kúni», «Tabıǵat bizdiń qolymyzda», «Túlekterdiń aǵash egýi» sııaqty ekologııalyq sharalar ótti. Al, «Taza jaǵalaý» aktsııasy aıasyndaǵy senbilikter turaqty túrde uıymdastyrylady. Jyl basynan beri oǵan 2 myńǵa jýyq adam qatysyp, 624 aǵash otyrǵyzylyp, 149 tonna qoqys shyǵarylǵan.
- «Taza Qazaqstan» ekologııalyq aktsııasy aıasynda 2 mamyr kúni «Qyzylsaı» memlekettik óńirlik tabıǵı parki «Samal» demalys ornynda senbilik jáne 19 mamyrynda «Sam ormandar jáne janýarlarlar dúnıesin qorǵaý jónindegi» mekemeniń orman qory aýmaǵyna shekaralas «Tas ótkel» kópirine tazalyq jumystary uıymdastyryldy. Sonymen qatar, mamyr aıynda Batys Qazaqstan oblysynyń Mańǵystaýǵa joldaǵan chellendji aıasynda Aqtaýda 2 jerde senbilik jumystary uıymdastyryldy. 1 lokatsııada 100-ge jýyq jastardyń qatysýmen 50 túp aǵash otyrǵyzyldy. 2 lokatsııada «Qarajanbasmunaı» AQ mekemesimen sanıtarlyq-tazalyq jumystary júrgizildi. Atalmysh estafeta (chellendj) Mańǵystaý oblysynan Pavlodar oblysyna joldandy, - delingen habarlamada.
Bıyl 17 maýsym kúni «Eko Mańǵystaý» úkimettik emes uıym bastamasymen «Taza Qazaqstan» jalpyulttyq respýblıkalyq ekologııalyq aktsııasy aıasynda keń aýqymdy senbilik uıymdastyrylǵan. Senbilikter Túpqaraǵan aýdany «43 shaqyrym» jáne Mańǵystaý aýdanyna qarasty «Samal» shatqalynda ótkizildi. Nátıjesinde 100 qap qoqys jınalyp, shyǵarylǵan.
- Óńirimizde aǵymdaǵy jyldyń shilde aıynda «Qara ýyldyryq» fılminiń túsirilimi ótti. Ártisterdiń jáne túsirilim tobynyń suraýy boıynsha «Taza Qazaqstan» aktsııasy aıasynda Aqtaý qalasy 15 shaǵyn aýdan «Samal» teńiz jaǵalaýyna tazalyq jumystary júrgizildi. Sonymen qatar, 5 shilde kúni «Taza Qazaqstan» ekologııalyq aktsııasy aıasynda Mańǵystaý oblysy ákimi Nurdaýlet Qılybaı, QR Senatynyń depýtaty Bekbol Orynbasarov, QR Parlamenti Májilisiniń depýtaty Edil Jańbyrshın, «Amanat» partııasy ókilderi, memlekettik qyzmetshiler, jastar men qala turǵyndarynyń qatysýymen merekelik senbilik ótkizildi. Tazalyq sharasy erekshe formatta uıymdastyryldy. Ekologııalyq aktsııaǵa 600-den astam turǵyn qatysyp, 15 tehnıka jumyldyryldy. 100-ge jýyq tonna qoqys shyǵaryldy, - deıdi basqarma ókilderi.
«Taza Qazaqstan» aktsııasy aıasynda Aqtaý qalasynyń 27, 28 shaǵyn aýdandarynda abattandyrý jumystary júrgizilip, jıek tastaryn ornatylyp, jaıaý júrginshiler jol tóselip, jaryq shamdary jańartylǵan. Senbilikter Fort-Shevchenko men Jańaózen qalalary aýmaǵynda jáne «Kendirli» jaǵajaıynda ótkizilgen. Jyl basynan beri oblys kóleminde 13 myńǵa jýyq túp aǵash otyrǵyzyldy.
- Búgingi kúnge deıin Qazaqstan Respýblıkasynyń Ákimshilik quqyq buzýshylyq týraly Kodeksiniń 505 babynyń «Qalalar men eldi mekenderdiń aýmaqtaryn abattandyrý qaǵıdalaryn buzý» faktileri boıynsha 371 quqyq buzýshylyq hattamasy toltyryldy, - delingen habarlamada.
Al, byltyr «Taza Qazaqstan» ekologııalyq aktsııasy aıasynda oblysy boıynsha 69 ruqsat etilmegen qoqys úıindileri anyqtalyp, sonyń 57si joıylǵan. Tarıhı-mádenı eskertkishterdi jáne baqtar men saıabaqtardy qalpyna keltirý jumystary júrgizilgen. Óńirde 20 myńnan astam aǵash otyrǵyzyldy. Ekonaýqan barysynda senbilikke 168 myńnan astam adam qatysyp, 27 462 tonna qoqys shyǵarylǵan.
Aıta keteıik, Úkimet basshysy «Taza Qazaqstan»aktsııasynyń aýqymdy ekologııalyq qozǵalysqa aınalǵanyn aıtty.