«Taza Qazaqstan» qundylyqtaryn balabaqshadan bastap qalyptastyrý kerek – depýtat
ASTANA. KAZINFORM – «Taza Qazaqstan» bastamasyn senbilik pen ekologııalyq aktsııalar sheńberinde qaldyrmaı, onyń qundylyqtaryn balanyń kúndelikti tárbıesine erte jastan engizý qajet. Quryltaı depýtaty Meıirhat Qasymbaev Úkimetke «Taza Qazaqstan» qaǵıdattaryna negizdelgen tárbıe úlgisin balabaqshadan bastap engizýdi usyndy.
Memleket basshysy «Taza Qazaqstan» bir rettik ekologııalyq naýqan emes, qoǵamnyń jańa mádenıeti bolýy keregin birneshe ret atap ótti. Bul rette áńgime tek kóshelerdiń tazalyǵy men qoqys jınaý týraly emes. Onyń aýqymy áldeqaıda keń — adamnyń ózine, aınalasyna, ózgege, ortaq múlikke jáne týǵan eline degen qurmetinen kórinetin mádenıet týraly.
– Sondyqtan bul bastama qalalarymyz ben aýyldarymyzdyń kelbetin ǵana emes, eń aldymen adamnyń oılaý júıesi men mádenıetin ózgertýge tıis. Ekologııa jáne tabıǵı resýrstar mınıstrliginiń málimetinshe, tek 2025 jyldyń ózinde «Taza Qazaqstan» is-sharalaryna shamamen 7 mıllıon adam qatysty. Alaıda sandarǵa qarasaq, eldi tazalaýdy úırengenimizben, ony taza ustaýǵa áli tolyq daǵdylana qoıǵan joqpyz, – deıdi depýtat.
Ekologııa mınıstrliginiń deregine sáıkes, 2025 jyly qoǵamdyq oryndardy lastaǵany jáne abattandyrý talaptaryn buzǵany úshin shamamen 600 myń adam jaýapqa tartylǵan. Salynǵan aıyppuldardyń jalpy kólemi – 5,2 mlrd teńge.
Budan bólek, resmı málimet boıynsha, 2025 jyly elimizde 3 828 ruqsat etilmegen qoqys orny anyqtalǵan.
– Másele qazir tek qoqyspen shektelmeıdi. Biz vandalızm, aıaldamalardy, qoǵamdyq kólikti, eskertkishterdi jáne basqa da múlikti búldirý faktilerin jıi kórip júrmiz. Al «Taza Qazaqstan» — tek aınalanyń taza bolýy emes. Bul — istiń tazalyǵy, adamǵa degen qurmet, ádildik, jaýapkershilik, nemquraılylyq pen ózgeniń eńbegin syılamaýǵa jol bermeý. Sondyqtan bul másele ekologııadan áldeqaıda keń. Áńgime adamnyń mádenıeti men kúndelikti ómirde basshylyqqa alatyn qaǵıdalary týraly bolyp otyr, – dedi M. Qasymbaev.
Quryltaı depýtaty máseleni tek saldarymen kúresý arqyly sheshý jetkiliksiz ekenin, mundaı árekettiń aldyn alatyn mádenıetti bala kezden qalyptastyrý qajettigin aıtýda.
– Adamnyń qorshaǵan ortaǵa, ózgelerge jáne ortaq múlikke kózqarasy otbasynda qalyptasyp, balabaqsha men mektepte odan ári ornyǵady. Bul rette tárbıeni kezekti tárbıe saǵatyna, baıqaýǵa nemese senbilikke ǵana tirep qoıýǵa bolmaıdy. Bala neniń jaqsy, neniń jaman ekenin bilip qana qoımaýy kerek. Adamdy qurmetteý, ádildik, jaýapkershilik, ózgeniń eńbegin baǵalaý jáne óz eline janashyrlyq onyń ishki ustanymyna aınalýǵa tıis, – deıdi spıker.
Osyǵan baılanysty Quryltaı depýtaty ázirlenip jatqan biryńǵaı ekologııalyq aǵartý standartynyń aıasyn keńeıtýdi usyndy. Onyń pikirinshe, mektepke deıingi jastan bastap balaǵa qorshaǵan ortany qorǵaý ǵana emes, adamdy qurmetteý, ózgeniń eńbegin baǵalaý, ádildik, tártip, jaýapkershilik jáne qoǵamdyq múlikke uqypty qaraý sııaqty qundylyqtar da úıretilýi kerek.
Bul qaǵıdattar jekelegen aktsııalar men tárbıe saǵattarymen shektelmeı, balabaqsha men mekteptiń kúndelikti ómirine enýge tıis.
– «Taza Qazaqstan» aıasyndaǵy jumystyń nátıjesin ótkizilgen is-sharalardyń nemese jazylǵan esepterdiń sanymen baǵalaý da durys emes. Mańyzdysy – balanyń alǵan tárbıesin kúndelikti ómirde kórsete alýy. ıAǵnı tazalyqty saqtaýy, ózgeniń eńbegin qurmetteýi, ortaq múlikke zııan keltirmeýi jáne óz áreketine jaýap bere bilýi qajet. «Taza Qazaqstannyń» maqsaty – eldi taza ustaý ǵana emes, tazalyqty, ádildikti, qurmet pen jaýapkershilikti adamnyń ishki ustanymyna aınaldyrý, – dep qorytyndylady Quryltaı depýtaty.
Eske sala ketsek, «Taza Qazaqstan» jalpyulttyq ekologııalyq aktsııasy 2024 jyly bastaldy. Sol jyly Prezıdent Qasym-Jomart Toqaev qoǵamda tazalyq mádenıetin qalyptastyrý bastamasyn kótergen edi.
Buǵan deıin Quryltaı depýtaty Aıjan Ysqakova tazalyqtyń ulttyq standartynyń negizgi kórsetkishterin qamtıtyn tsıfrlyq pasport jasaýdy usynǵan edi.
