«Taza Qazaqstan» qozǵalysyna mıllıondaǵan erikti qosyldy – Memleket basshysy
ASTANA. KAZINFORM – Jańa Ata zańda volonterlik qyzmetke aıryqsha mán berildi. Bul týraly elordadaǵy Óńirlik ekologııalyq sammıtte Memleket basshysy Qasym-Jomart Toqaev málim etti.
– Biz «Taza Qazaqstan» jalpyulttyq qozǵalysyna bastamashy boldyq. Halyqtyq sıpat alǵan naýqannyń maqsaty – ekologııalyq sana qalyptastyrý, azamattyq jaýapkershilikti arttyrý. Qozǵalysqa mıllıondaǵan erikti qosyldy. Meniń oıymsha, olar – Qazaqstannyń naǵyz patrıottary. Óıtkeni dál osylaı eńbek etip, ortaq múddege úles qosý – eliniń keleshegin oılaıtyn azamattardyń ǵana qolynan keletin izgi is, - dedi Qasym-Jomart Toqaev.
Prezıdent Birikken Ulttar Uıymynyń sheshimimen bıyl Halyqaralyq eriktiler jyly dep jarııalanǵanyn eske saldy.
– Turaqty damý múddesine saı keletin bul bastamany tolyq qoldaımyz. Elimizdiń jańa Ata zańynda volonterlik qyzmetke aıryqsha mán berilip, olarǵa memleket tarapynan qoldaý kórsetiletini naqty jazylǵan. Bıyl – Qazaqstanda Tsıfrlandyrý jáne jasandy ıntellekt jyly. Jasandy ıntellekt kómeginsiz ekologııalyq máselelerdi ońtaıly sheshý múmkin emes ekeni anyq. Atalǵan tehnologııa tabıǵı resýrstardy qorǵaý, ekologııalyq basqarýdy jetildirý isinde mol múmkindikke jol ashady. Sondyqtan biz Aımaqtyq tsıfrlyq ekojúıe qurý bastamasyn qoldaýǵa ázirmiz, - dedi Memleket basshysy.
Budan buryn habarlanǵandaı, búgin elordada Memleket basshysy Qasym-Jomart Toqaevtyń qatysýymen «Ornyqty bolashaqqa ortaq kózqaras» taqyrybymen Óńirlik ekologııalyq sammıt (ÓES) jumysyn bastady.
