«Taza Qazaqstan»: Qonaev qalasynda 70 myń gúl egildi
QONAEV. KAZINFORM — Almaty oblysynyń ortalyǵynda «Taza Qazaqstan» aktsııasy jalǵasyp jatyr. Atalǵan ekonaýqannyń aıasynda shahardaǵy saıabaqtarǵa, eskertkishterdiń mańyna, kóshe boıyna 70 myń gúl egilgen. Bul týraly «Jasyl qala Qonaev» memlekettik kommýnaldyq kásipornynyń basshysy Mark Beıdalı málimdedi.
Mekeme basshysy kásiporynnyń jyl basynan beri 500-den astam aǵash otyrǵyzǵanyn atap ótti.
«Barlyq aǵashty kútip ustaý, jersindirý maqsatynda olardy dárýmendermen sýaryp jatyrmyz. Mıkroelementterdiń adam densaýlyǵyna eshqandaı zııany joq, allergııa týdyrmaıdy», - dedi kásiporyn basshysy.
Sondaı-aq onyń aıtýynsha, qala tazalyǵyn saqtaýǵa kúndelikti 150 adam jáne 25 tehnıka jumyldyrylady.
«Aǵashtardy sanıtarly kesýmen de aınalysamyz. Ol úshin turǵyndar páter ıeleri kooperatıvterine ótinish tastaýy qajet. Keıinnen sol ótinishter boıynsha keste ázirlenip, jumys atqarylady», - dedi Mark Beıdalı.
Eske salsaq, buǵan deıin Almatyda ótken ekonaýqanǵa 400 myńnan astam adam qatysqanyn jazǵan edik.
