«Taza Qazaqstan»: Qyzylorda oblysynda 12 000 tal egildi
QYZYLORDA. KAZINFORM – Memleket basshysy «Taza Qazaqstan» respýblıkalyq ekologııalyq aktsııasyna qatysty. Qasym-Jomart Toqaev ekobelsendilermen birge elordanyń «Samal» saıabaǵynda aǵash otyrǵyzdy.
Prezıdentke jaýapty memlekettik organ basshylary atqarylǵan jumys jaıynda baıandady.
Ekologııa jáne tabıǵı resýrstar mınıstri Erlan Nysanbaev «Taza Qazaqstan» aktsııasy bastalǵan eki jyl ishinde 1,5 myń ekologııalyq is-shara uıymdastyrylǵanyn jetkizdi. Osy ýaqyt aralyǵynda 2 mıllıon tonna qoqys jınalyp, 5,5 mıllıonǵa jýyq tal egilgen. Jyl saıyn bul bastamaǵa 6,5 mıllıon adam, sonyń ishinde 780 myń volonter qatysady.
Mınıstrdiń aıtýynsha, 2021-2025 jyldary orman qoryn tolyqtyrý úshin 1 mıllıonnan asa gektarǵa 1 648,4 mıllıon túp kóshet otyrǵyzylǵan. Eldi mekenderde bes jyl ishinde 18,4 mıllıon aǵash egildi. Aldaǵy ýaqytta 1 760 myń gektar jerdi qamtıtyn 46 ekoaýmaq qurylady.
Qyzylorda qalasynda jańadan salynǵan Prezıdent saıabaǵyndaǵy sharaǵa oblys ákimi Nurlybek Nálibaev, ardagerler men zııaly qaýym ókilderi, quqyq qorǵaý organdarynyń basshylary, oblystyq jáne qalalyq máslıhat depýtattary, oblystyq basqarma, departament, ınspektsııa basshylary men qyzmetkerleri, eriktiler, ekobelsendiler, jastar uıymdary jáne stýdentter qatysty.
Aktsııaǵa aımaqtyń aýdandarynan, eldi mekenderinen 25 000 myńnan astam adam atsalysyp, 12 myńnan astam tal egildi, 325,7 gektar aýla tazartylyp, 320 tonnadan astam qoqys shyǵaryldy, 250-den astam tehnıka jumyldyryldy.
Óńirde «Taza Qazaqstan» respýblıkalyq ekologııalyq aktsııasy aıasynda turǵyndardyń ómir súrýine qolaıly jaǵdaı jasaý baǵytynda keshendi jumystar júrgizilip jatyr.
Kásipkerlerdiń demeýshiligimen ortalyq alańdar, demalys oryndary, oıyn, sport alańdary qaıta jańǵyrtylyp, turǵyn úıler men áleýmettik nysandar zamanaýı úlgide jóndeýden ótkizilýde.
Qyzylorda qalasyndaǵy ortalyq alań, qalalyq mádenı-demalys parki, Qorqyt ata memorıaldy alleıasy jańǵyrtylsa, Prezıdent saıabaǵy qaıta salyndy. Onda zamanaýı sýburqaqtar, amfıteatr, sport, oıyn, bı, shahmat, basketbol, fýtbol alańdary, bıiktigi 50 metrlik aınalmaly sholý dóńgelegi, velosıped jáne júgirý jolaqtary, sanıtarlyq pýnktter ornatylǵan. Jalpy 31 gektarǵa 2 myńnan astam aǵash, 50 myńnan astam sándik buta jáne 17 túrli kópjyldyq gúl egildi.
Qazirgi tańda Prezıdent saıabaǵy aýmaǵynda 10 mlrd. teńgege jyldyń tórt mezgilinde úzdiksiz jumys isteıtin 300 oryndyq zamanaýı balalar tynyǵý lageri, 5 mlrd. teńgege Botanıkalyq bilim berý ortalyǵy (qysqy baq) salynýda. Jaqynda 9 mlrd. teńgege Syrdarııa ózeni ústinen Prezıdent saıabaǵyn qalamen baılanystyratyn jaıaý júrginshiler kópiriniń qurylysy bastalady.
Bul jumystar barlyq aýdanda jalǵasyn taýyp, jańa demalys oryndary, alleıalar aınalanyń sánin kirgizdi, kóshelerge abattandyrý, jaryqtandyrý jumystary atqarylyp jatyr.
Aýyldarda qolaıly orta qalyptastyrý, turǵyndardy tazalyq sharalaryna yntalandyrý maqsatynda jyl saıyn «Úlgili eldi meken» konkýrsy ótkiziledi. Sońǵy úsh jylda 2 mlrd. 64 mln. teńge bólinip, úzdik eldi mekenderge 67 arnaıy tehnıka tabystaldy.
Turmystyq qatty qaldyqtardy tıimdi basqarý, olardy suryptaý, óńdeý jáne kádege jaratý baǵytynda «Jasyl damý» AQ qarjylandyrýymen 98 mlrd.700 mln. teńgege 9 joba qolǵa alynǵan. Jańaqorǵan aýdanyndaǵy qatty qaldyqtardy suryptaý kesheni tolyq qarjylandyrylyp, qural-jabdyqtary jetkizildi. Qazirgi tańda iske qosylýda. Qalǵan 8 joba «Ónerkásipti damytý qory» saraptamasynan ótkizilip, qarjylandyrý úshin tıisti kelisimsharttar jasalýda.
Oblystyq bıýdjetten 475 mln.teńgege Syrdarııa aýdanynda suryptaý kesheni bar qatty turmystyq qaldyqtar polıgony ashyldy. Taǵy eki jańa joba jasalyp, memlekettik saraptamadan ótkizildi, salalyq mınıstrlikke qarjylandyrý úshin usynyldy.
Qaldyqtardy suryptaý mádenıetin qalyptastyrý maqsatynda oblys kóleminde 10 myńǵa jýyq konteıner ornatyldy. Kópqabatty turǵyn úıler, iri saýda oryndary, áýejaı men temirjol vokzaly aýmaqtarynda shyny, plastık jáne qaǵaz qaldyqtaryn suryptap jınaý úshin arnaıy ekobokstar qarastyrylǵan.
Qyzylorda qalasyndaǵy 83 eski kópqabatty turǵyn úıdiń qasbetteri zamanaýı paneldermen jańartyldy, bul jumystar 58 turǵyn úıge 2 mlrd. 893 mln. teńgege bıýdjet esebinen, 27 turǵyn úıge demeýshilik esebinen jasaldy. Bıyl 900 mln.teńgege qosymsha 21 turǵyn úıdiń qasbetterin qaptaý josparlanǵan.
Halyq arasynda ekologııalyq mádenıetti qalyptastyrý, ekologııalyq bilim berý, aǵartý sharalary «Jasyl balabaqsha»,«Jas ekolog»,«Jasyl mektep», «Tabıǵat saqshylary» jobalary aıasynda júzege asyrylyp keledi.
