«Taza Qazaqstan» kıno salasyndaǵy ıdeologııalyq basym taqyrypqa aınaldy — Balaeva

ASTANA. KAZINFORM — Mádenıet jáne aqparat mınıstri Aıda Balaeva Prezıdenttiń «Taza Qazaqstan» bastamasyn júzege asyrý sharalary týraly aıtyp berdi.

Mınıstrdiń aıtýynsha, «Taza Qazaqstan» bastamasy az ýaqyt ishinde jalpyulttyq sıpat alyp, halqymyzdy ortaq múddege biriktirgen úlken ıdeologııalyq platformaǵa aınaldy.

— Osy oraıda, Prezıdent bastamasyn halyq arasynda keńinen nasıhattaý maqsatynda keshendi ári júıeli jumystar atqarylyp keledi. Birinshi baǵyt — aǵartýshylyq, mádenı jáne gýmanıtarlyq sıpattaǵy uıymdastyrýshylyq sharalar. «Jasyl el» jastar eńbek jasaqtaryna bıyl 35 myńnan astam jas tartylyp otyr. Keler jyldan bastap bul jasaqtar tehnıkalyq, agrarlyq, qurylys jáne pedagogıkalyq baǵyttarmen tolyǵady, — dedi A. Balaeva Úkimet otyrysynda.

Sonymen birge, azamattyq belsendilerdiń qatysýymen birqatar ekologııalyq aktsııa ótip keledi. Mysaly, «Qoǵamdyq eko-baqylaý» respýblıkalyq aktsııasy, «10 ekologııalyq ádet» eko-chellendji jáne «Taza jaǵalaý» eko-marafonyn aıryqsha atap ótýge bolady. Bul aktsııalarǵa 12 myńnan astam belsendi azamat qatysyp júr.

«Taza Qazaqstan» ıdeıasyn qoldaýǵa bıznes-qoǵamdastyq ta belsene atsalysyp keledi. Atap aıtqanda, «Samuryq-Qazyna» kompanııalar toby ekologııalyq jaýapkershilikti korporatıvtik mádenıettiń mańyzdy bóligine aınaldyryp, elimiz boıynsha 300-den astam túrli formattaǵy is-shara uıymdastyrdy.

Qazaqstan halqy Assambleıasy uıymdastyrǵan 300-den astam ekologııalyq is-sharaǵa 20 myńnan astam adam qatysyp, etnosaralyq kelisim men ózara qurmet qundylyqtaryn nyǵaıta tústi. Sondaı-aq «Assambleıa jastary», «Aqsaqaldar keńesi», «Analar keńesi» sııaqty ınstıtýttar óńirlik deńgeıde belsendi jumys istep jatyr.

— Mınıstrlik ótken jyly kıno salasyndaǵy ıdeologııalyq basymdyqtardy naqtylady. Qazirgi kezde «Zań men tártip», «Taza Qazaqstan» — basty taqyryptardyń birine aınalýda. «Taza Qazaqstan» ıdeıasy sheteldegi mádenı is-sharalar, halyqaralyq forýmdar men festıvalder, Mádenıet kúnderi aıasynda da keńinen tanystyrylyp keledi. Telearnalarda «Taza Qazaqstan» brendimen serıaldar, derekti fılmder men arnaıy jobalar qosylady, — dedi A. Balaeva.

Aıta keteıik, Premer-mınıstr qoqys tastaıtyn adamdarǵa jazany qatańdatýdy tapsyrdy.