Taza Qazaqstan: Qarmaqshy aýdanynda birqatar joba júzege asty
QYZYLORDA. KAZINFORM — Qyzylordada «Taza Qazaqstan» ekologııalyq jobasy aıasynda Qarmaqshy aýdanynda birqatar jobalar júzege asyrylyp jatyr.
Memleket basshysy Qasym-Jomart Toqaev óziniń Qazaqstan halqyna Joldaýynda: «Negizgi mindetterdiń biri — ekologııalyq jaǵdaıdy jaqsartý jáne qorshaǵan ortaǵa uqypty qaraýdy damytý.
— Taza Qazaqstan» jalpyulttyq ekologııalyq aktsııasy — ýaqytsha naýqan emes, osyndaı ıgi sharalardyń arqasynda qoǵamda jańa mádenıet, jańa qoǵamdyq etıka ornyǵyp keledi. Muny týǵan elge degen súıispenshilik, janashyrlyq deýge bolady. Ulttyń jańa sapasy osyndaı naqty sharalar arqyly qalyptasady, — dep atap ótken bolatyn.
Bıyl oblys ákimi Nurlybek Nálibaevtyń bastamasymen Qarmaqshy aýdanynyń Josaly jáne Tóretam kentterinde ornalasqan temir jol vokzaly ǵımarattaryna kúrdeli jóndeý jumystary bastaldy.
Joba aıasynda ǵımarat irgetasy men qabyrǵalary nyǵaıtylyp, shatyr, esik-terezeler tolyq jańartylyp, jolaýshylarǵa arnalǵan kútý zaldary zamanaýı standarttarǵa saı jabdyqtalady.
Múmkindigi shekteýli jandarǵa arnalǵan qoljetimdilik elementteri men qaýipsizdik júıeleri ornatylady. Sonymen qatar, vokzal mańyn kógaldandyrý jáne brýschatka tóseý jumystary da qarastyrylǵan.
Bul jumystar — turǵyndarǵa sapaly qyzmet kórsetý, óńirimizdiń ınfraqurylymyn jaqsartý jáne jolaýshylarǵa qolaıly jaǵdaı jasaý maqsatynda júzege asyrylyp jatyr.
Sonymen qatar, aýdan ortalyǵynyń Josaly kenti jáne aýdanǵa qarasty eldi mekenderde turǵyndardyń usynys-talaptary nazarǵa alynyp, ortalyq alańdardy qaıta jóndeý, qoǵamdyq oryndardy abattandyrý, oıyn jáne shaǵyn fýtbol alańdarynyń qurylys jumystary júrgiziledi.
Atalǵan jobalar aýyldyq eldi mekenderdiń kórkeıýýine, balalar men jasóspirimderdiń sportpen aınalysýyna, bos ýaqytyn tıimdi ótkizýine óz septigin tıgizbek.
Budan bólek, «Taza Qazaqstan» respýblıkalyq ekologııalyq jobasy aıasynda óńirdiń barlyq eldi mekenderinde sanıtarlyq tazartý, kórkeıtý-kógaldandyrý jumystary qarqyndy júrgizilmek.
Jyl basynan beri oblys kóleminde tazalyq sharalaryna barlyǵy 211 myńnan asa (211 663) eriktiler, qoǵam qaıratkerleri, bıýdjet salasy men kásiporyn qyzmetkerleri qatysty.
Nátıjesimen 9 myń tonna (9 073) astam qoqys qaldyqtary shyǵarylyp, eldi mekenderdegi 490 skverler men parkter, 239 tarıhı-mádenı eskertkishter, 1019 áleýmettik nysandar (mektepter, bala-baqshalar, sport, densaýlyq saqtaý jáne t. b.), 2 888 ónerkásip jáne bıznes nysandary, 60 sý obektileri (ózender, kólder, jasandy sý aıdyndary, sýburqaqtar, aryqtar jáne t.b), men 24 624 kóshelerdiń boıy (4 525 kóp qabatty úıler men 20 099 jer úılerdiń aýlalary) tazartyldy. Oǵan 540-tan asa tehnıka (548) jumyldyryldy.
Oblys boıynsha 240 700 dana óńirdiń klımatyna sáıkes jersinetin qaraǵash, terek jáne syrtalynyń kóshetteri egildi.