Qarın: «Taza Qazaqstan» ekoaktsııasynyń ıdeologııasy — tazalyq pen tártipti saqtaý
ASTANA. KAZINFORM — Búgin elordada «Taza Qazaqstan» jalpyulttyq naýqany aıasynda senbilik uıymdastyryldy, dep habarlaıdy Aqordanyń baspasóz qyzmeti.
Memlekettik keńesshi Erlan Qarın Ulttyq quryltaıdyń jáne Jastar saıasaty jónindegi keńestiń bir top múshelerimen birge aǵash otyrǵyzdy.
Onyń sózinshe, «Taza Qazaqstan» aktsııasy bir jyl buryn Memleket basshysy Qasym-Jomart Toqaevtyń bastamasymen qolǵa alyndy. Jurtshylyq bul bastamaǵa birden qoldaý kórsetti. Memlekettik keńesshi «Taza Qazaqstannyń» ekologııalyq aktsııa ǵana emes ekenin, onyń búginde azamattarymyzdyń minez-qulqy men oı-órisine yqpal etetin ıdeologııaǵa aınalyp kele jatqanyn atap ótti.
— Bul ıdeologııanyń túpki máni — tazalyq pen tártipti saqtaý, tabıǵatty aıalaý, mádenıetsizdikke, vandalızmge jáne qoǵamdyq tártipti buzýǵa qarsy kúres. Osylaısha, «Taza Qazaqstandy» qalyptasyp kele jatqan jańa qoǵamdyq etıkanyń bir jarqyn kórinisi deýge bolady, — dedi Qarın.
Osyǵan deıin Úkimet apparaty «Taza Qazaqstan» ekologııalyq bastamasy aıasynda senbilikke qatysqanyn jazǵanbyz.