Taza Qazaqstan: Qaldyq jınaý men suryptaýda jańa tehnologııalar qoldanyla bastady
ASTANA. KAZINFORM – Byltyr «Taza Qazaqstan» aktsııasy aıasynda 4,5 mln tonna qoqys jınaldy. Bul týraly Jibek Joly telearnasynyń «Búgin LIVE» baǵdarlamasyna suhbat bergen Ekologııa jáne tabıǵı resýrstar mınıstrligi Tsıfrlyq transformatsııa jáne jobalardy basqarý departamentiniń bas sarapshysy málimdedi.
– «Taza Qazaqstan» aktsııasy bastalǵannan beri jobaǵa 10 mln 400 myńnan astam adam atsalysty. Jalpy aýmaǵy 859 myń gektardan asa jer tazartyldy. Negizgi baǵyt retinde 2 máseleni aıta alamyz. Olar – qaldyqtardy tazalaý men kógaldandyrý jáne el aýmaǵyndaǵy orman sharýashylyǵyn júrgizý. Byltyr 4,5 mıllıon tonnadan asa qaldyq tazalandy. Sol qaldyqtardy tazalaý úshin 67 joba júzege asyrylyp, 346 mlrd teńgeden astam qarajat bólindi, – deıdi Qazbek Jumadillá.
Aktsııa barysynda qazaqstandyqtar Aral teńiziniń de máselesin sheshýge úles qosyp jatyr.
– Kógaldandyrý jumystary úshin ormandarǵa 1 mlrd 349 mln kóshet otyrǵyzyldy. Aral aýmaǵyna 48 mıllıon aǵash egildi. Onda teńizdiń tartylýyna baılanysty sekseýil otyrǵyzylyp jatyr, – deıdi maman.
Sońǵy jyldary elimizdegi qoqystardy jınaý men suryptaýda jańa tehnologııalar da qoldanyla bastady. Bul – qoqys polıgondaryna tastalatyn qaldyqtardy edáýir azaıtyp, el ekologııasyna aıtarlyqtaı oń yqpalyn tıgizbek.
– Qoǵamdyq qaldyqtardy suryptaý barysynda el aýmaǵyna 100-den astam fandomattar qoıyldy. Fandomat degenimiz ne? Allıýmınıı, plastık sekildi qaldyqtardy sol qurylǵyǵa salý arqyly azamattar bonýs ala alady. Al qoqystardy suryptaý úshin Astana, Almaty, Óskemen jáne Aqtóbe qalalaryndaǵy 129 mektepke myńnan asa ekoboks ornatyldy. Sol ekobokstarǵa adamdar túrli qoqystaryn bólip sala alady. Eger osyndaı fandomattar men ekobokstar kóptep ornatylsa, polıgonǵa tógiletin qoqystar azaıady. Al qurylǵydaǵy qoqystar qaıta óńdeýge jiberiledi, – deıdi mınıstrlik ókili.
Tsıfrlyq transformatsııa jáne jobalardy basqarý departamentiniń bas sarapshysy «Taza Qazaqstan» aktsııasynyń negizgi maqsaty halyqtyń ekologııalyq mádenıetin kóterý ekenin eske saldy.
– Ótken jyldar men bıyldy salystyrar bolsańyzdar, nátıje baıqalady. Sońǵy ýaqytta ár adam óz aýlasyn taza ustaýǵa tyrysyp jatyr. Barsha qazaqstandyqtardy «Taza Qazaqstan» aktsııasy aıasynda birlese belsendi jumys isteýge shaqyramyn. Tazalyq tek mınıstrlik pen jergilikti atqarýshy organdarǵa ǵana emes, barsha Qazaqstan Respýblıkasynyń azamattaryna kerek qoı. Elimizdi taza ustaıyq! – dep túıindedi Qazbek Jumadillá.
Aıta keteıik, buǵan deıin «Taza Qazaqstan» bastamasy aıasynda bıyl 934 ekologııalyq is-shara ótkizilgeni týraly jazǵan edik.