«Taza Qazaqstan»: elordada jańa býynǵa arnalǵan Zara’s Planet ekokvesti ótti
ASTANA. KAZINFORM — Aýqymdy «Taza Qazaqstan» ekologııalyq aktsııasy aıasynda Astanada balalardy, ata-analardy jáne eriktilerdi ekologııalyq oılaý men tehnologııalyq kásipkerlik ıdeıalarynyń aınalasyna biriktirgen erekshe ekokvest uıymdastyryldy.
Іs-shara Arsenal SOO-da qala ákimdiginiń qoldaýymen ótti. Uıymdastyrýshysy — ekologııa men tehnologııanyń túıisken tusynda bilim berý jobalaryn damytyp júrgen Global Green Hub kompanııasy.
Іs-sharanyń basty keıipkerleri — balalar. Olar tek oıynǵa qatysyp qana qoımaı, ekoınjenerler sııaqty oılanýǵa, ekologııalyq máselelerdi sheshýge jáne óz ıdeıalaryn usynýǵa mashyqtandy.
Qatysýshylar Zara, Mo jáne T9 esimdi keıipkerlermen birge kvestten ótýi qajet. Ár kezeń balanyń synı, kreatıvti jáne ekologııalyq oılaýyn damytýǵa baǵyttalǵan.
— Búginde balalar suryptaý júıesin jáne turaqty damýdyń negizgi ustanymdaryn tereńirek túsine bastady. Bizde arnaıy termın bar — ekotehnooılaý. Bul — ekologııany, tehnologııany jáne psıhologııany biriktirgen avtorlyq uǵym. Maqsatymyz — óz ekojobalaryn jasap, iske asyrýdan qoryqpaıtyn jańa býyndy tárbıeleý, — dedi Global Green Hub negizin qalaýshy Ásel Seıfýllına.
Uıymdastyrýshylardyń aıtýynsha, olar aldaryna bıik maqsat qoıyp otyr: keńinen oılaı alatyn, dál áreket ete biletin, elin jaqsy jaqqa ózgertetin sanaly jańa býyndy tárbıeleý.
Іs-sharaǵa qatysqan kishkentaı Dáýlet pen Alına bolashaqqa senimmen qaraıdy.
— Meniń jasym beste. Ekorobototehnıka kýrsyna baramyn. Maǵan jobalaý unaıdy, energııa kózderi týraly bilemin. Óskende ekoınjener bolamyn, — dedi Dáýlet.
— Men bir joba daıyndadym — bólmedegi aýanyń tazalyǵyn kórsetetin gúl. Bul joba baıqaýǵa qatysýǵa kómektesti. Balalar úshin osyndaı ekojobalar jasaı alatyn oryndar kóp bolsa eken deımin, — dedi Alına.
Ekologııalyq sharany «Astana jastary» Jastar resýrstyq ortalyǵynyń eriktileri qoldady.
— Mundaı sharalar tabıǵatty aıalaýǵa, qoqysty suryptaýǵa, aǵash otyrǵyzýǵa jáne jaı ǵana jaýapty adam bolýǵa úıretedi. Bul — tazalyqtyń densaýlyq pen ózińe, aınalańa degen qurmet ekenin eske salatyn jaqsy múmkindik, — dedi erikti Asyl Erǵalıeva.
Uıymdastyrýshylardyń aıtýynsha, memleket qoldaýynyń, ata-analar men balalardyń azamattyq belsendiliginiń arqasynda Qazaqstan ekologııalyq oılaýdy damytýda kóshbasshy elge aınala alady.
Aıta ketelik Astanada ekobýkkrossıng sóresi ashyldy.