«Taza Qazaqstan»: ekologııalyq tártip buzǵan 351 laýazymdy tulǵa jaýapqa tartyldy
ASTANA. KAZINFORM — Іshki ister mınıstrliginde keńeıtilgen alqa otyrysy ótti. Jıynda jyl basynan beri 213 myńnan astam ákimshilik quqyq buzýshylyqtyń joly kesilip, 1 397 zańsyz qoqys úıindisi anyqtalǵany aıtyldy. Bul týraly Polisia.kz jazdy.
ІІM basshysy «Taza Qazaqstan» bastamasy eń aldymen zańǵa qurmet, qoǵamdyq tártip jáne ár azamattyń jeke jaýapkershiligi ekenin atap ótti. Kósheler men qorshaǵan ortanyń tazalyǵy osy mádenıettiń ajyramas bóligi sanalady. Osy baǵyttaǵy jumystar aıasynda jyl basynan beri 213 myńnan astam ákimshilik quqyq buzýshylyqtyń joly kesilip, 1 397 zańsyz qoqys úıindisi anyqtaldy. Polıtsııa materıaldary negizinde olardyń 952-si joıyldy.
— Sanıtarııalyq-epıdemıologııalyq jáne ekologııalyq talaptardy buzǵany úshin 351 laýazymdy tulǵa, onyń ishinde 102 ákim jáne turǵyn úı-kommýnaldyq sharýashylyq salasynyń 249 ókili ákimshilik jaýapkershilikke tartyldy, — delingen habarlamada.
Vedomstvonyń málimetinshe, basym baǵyttardyń biri — jol qozǵalysy qaýipsizdigin qamtamasyz etý. Esepti kezeńde jol-kólik oqıǵalarynyń sany 4%-ǵa, qaza tapqandar sany 20%-ǵa, jaraqat alǵandar sany 7%-ǵa azaıǵan.
Mınıstr jol-kólik oqıǵalarynyń aldyn alý jumystaryn kúsheıtýdi, jol qozǵalysy erejelerin óreskel buzýshylarǵa qatysty sharalardy qatańdatýdy jáne olardy anyqtaý úshin tsıfrlyq tehnologııalardy belsendi paıdalanýdy tapsyrdy. Sondaı-aq jalǵa beriletin elektrsamokattaryn paıdalaný jónindegi jańa talaptardyń oryndalýy qaraldy.
Mınıstr kıksherıng kompanııalarynyń belgilengen talaptardy saqtaýyn baqylaýdy jáne turǵyndar arasynda túsindirý jumystaryn júrgizýdi tapsyrdy.
Eske sala keteıik, Іshki ister organdarnda bıylǵy jyldyń birinshi jartyjyldyǵyndaǵy jedel-qyzmettik qyzmet qorytyndycy shyǵarylyp, aldaǵy kezeńge negizgi mindetter aıqyndaldy.
Buǵan deıin aýyr jáne asa aýyr qylmystardyń ashylýy jaqsaryp, izdeýde júrgen júzdegen qylmysker ustalyp sondaı-aq birqatar uıymdasqan qylmystyq top pen zańsyz kóshi-qon arnalarynyń qyzmeti toqtatylǵanyn jazdyq.
