«Taza Qazaqstan» ekologııalyq mádenıetke bastaıtyn ulttyq joba
ASTANA. KAZINFORM – «Taza Qazaqstan» bir rettik ekologııalyq aktsııa emes, qoǵamnyń ekologııalyq sanasyn qalyptastyrýǵa baǵyttalǵan uzaqmerzimdi ulttyq joba. Bul týraly «JASYL EL» jastar eńbek jasaqtary respýblıkalyq shtabynyń basshysy Nurasyl Bekmatov Kazinform agenttigine bergen suhbatynda aıtty.
Onyń aıtýynsha, jobanyń basty maqsaty – qorshaǵan ortany qorǵaý mádenıetin qalyptastyrý, ekologııalyq ahýaldy jaqsartý jáne árbir azamattyń tabıǵat aldyndaǵy jaýapkershiligin arttyrý.
– Ekologııa máselesi ulttyq qaýipsizdikpen, halyq densaýlyǵymen jáne turaqty damý qaǵıdattarymen tikeleı baılanysty. Taza orta – sapaly ómirdiń negizi. Osy turǵyda «Taza Qazaqstan» jobasyn el bolashaǵyna salynǵan ınvestıtsııa deýge tolyq negiz bar, – dedi ol.
«JASYL EL» 2005 jyldan beri eldi mekenderdi abattandyrý, kógaldandyrý jáne ekologııalyq mádenıetti nasıhattaý baǵytynda júıeli jumys júrgizip keledi.
Nurasyl Bekmatovtyń málimetinshe, 2025 jyly «JASYL EL» arqyly 35,9 myń jas maýsymdyq jumyspen qamtylǵan. Al «Taza Qazaqstan» jalpyulttyq jobasy bastalǵaly beri jastar eńbek jasaqtary 2,5 myńnan astam is-shara uıymdastyryp, 50 myńǵa jýyq aǵash otyrǵyzǵan jáne 46 myń tonnadan astam qoqys shyǵarǵan.
– Jobanyń basty nátıjesi – tazalyqtyń ýaqytsha naýqan emes, kúndelikti daǵdyǵa aınalýy. Ár azamat óz aýlasynan, kóshesinen, jumys ornynan bastap qorshaǵan ortaǵa uqypty qaraýdy qalypty áreket retinde qabyldaýy tıis, – dedi shtab basshysy.
Onyń aıtýynsha, «JASYL EL» jasaqtary senbilikterge, aǵash otyrǵyzý aktsııalaryna jáne qoǵamdyq oryndardy tazalaý jumystaryna belsendi qatysyp qana qoımaı, ekologııalyq tárbıe men jaýapkershilikti nasıhattaýshy kúshke aınalyp otyr. Jasaq músheleri úshin tazalyq – mindet emes, azamattyq ustanym.
Sondaı-aq joba aıasynda qoqysty suryptaý, jasyl aımaqtardy kóbeıtý, sý kózderin qorǵaý jáne tabıǵı resýrstardy utymdy paıdalaný mádenıetin qalyptastyrý kózdelgen. Bul sharalar qoǵamdaǵy ekologııalyq sanany arttyryp, ásirese jastardyń tabıǵatqa degen kózqarasyn ózgertýge yqpal etedi.
Nurasyl Bekmatov «Taza Qazaqstan» jobasynyń tıimdi júzege asýy ashyqtyq pen júıeli baqylaýǵa tikeleı baılanysty ekenin atap ótti. Bul baǵytta ortalyq jáne jergilikti atqarýshy organdarmen qatar, qoǵamdyq uıymdar men jastar qozǵalystary da belsendi qatysyp keledi.
– Árbir is-shara boıynsha naqty esep júrgizilip, onyń nátıjesi qoǵamǵa ashyq túrde usynylady. Áleýmettik jeliler men buqaralyq aqparat quraldary arqyly turaqty aqparat berilip otyrady. Bul qoǵamnyń senimin arttyryp, azamattardy jobaǵa belsendi qatysýǵa yntalandyrady, – dedi ol.
Onyń aıtýynsha, «Taza Qazaqstan» jobasy men «JASYL EL» jastar eńbek jasaqtarynyń qyzmeti ózara úılesim taýyp, eldegi ekologııalyq mádenıetti qalyptastyrý jolyndaǵy mańyzdy kúshke aınalyp otyr.
Eske sala keteıik, Almaty jańa jyldy «Taza Qazaqstan» aktsııasymen bastady.
Sonymen qatar «Taza Qazaqstan»: onlaın-platformaǵa astanalyqtardan 3 600-den astam ótinim túskenin jazǵanbyz.