«Taza Qazaqstan» - bizdiń ómir saltymyz – Prezıdent
ASTANA. KAZINFORM - Memleket basshysy «Taza Qazaqstan» ekologııalyq festıvalinde sóz sóıledi, dep habarlaıdy Aqordanyń baspasóz qyzmeti.
Prezıdent óz sózinde búgingi jıynnyń mańyzyna toqtalyp, «Tazalyq» festıvali óte taǵylymdy is-shara ekenin aıtty.
– Osydan bir jyl buryn bárimiz bir el bolyp «Taza Qazaqstan» jobasyn bastadyq. Men, eń aldymen, osy jalpyulttyq bastamaǵa alǵashqy kúnnen bastap belsene qatysyp jatqan ár azamatqa shyn júrekten rızashylyǵymdy bildiremin. Ásirese, solardyń qatarynda ózderińiz sııaqty jalyndy ári daryndy jastarymyz óte kóp. Sizder elimizdiń ár aımaǵynda eńbek etip, qoǵamdyq jumysqa atsalysyp júrsizder. Bul – úlgi bolarlyq is. Men Memleket basshysy retinde sizderdi árdaıym qoldaımyn! – dedi Qasym-Jomart Toqaev.
Memleket basshysy tazalyqtyń máni men maǵynasy jaıyndaǵy pikirimen bólisip, oıdyń da, boıdyń da, qorshaǵan ortanyń da tazalyǵyn saqtaý ár adamnyń ishki mádenıetiniń kórsetkishi dep baǵa berdi. Sondyqtan tazalyq halqymyzdyń bolmysyna sińgen qasıet bolýy qajet ekenin únemi aıtyp kele jatqanyn eske saldy.
– Tazalyq ár adamnan, ár úıden, árbir kóshe men ár qaladan bastalýy kerek. Óıtkeni «Taza Qazaqstan», bul – bir kúndik naýqan emes. Bul – bizdiń ómir saltymyz. «Jas kelse – iske» dep halqymyz beker aıtpaǵan. Barshańyzdy tabıǵatty qorǵaý ıdeıasy biriktirip otyr. Sizder bárińiz birge istep jatqan jumystyń arqasynda bul ıgi bastama osyndaı úlken qozǵalysqa aınaldy. Ortaq iske kúsh jumyldyrý degenimiz – osy, – dedi Prezıdent.
Qasym-Jomart Toqaev eriktilerdiń eńbegin de erekshe atap ótti.
Onyń aıtýynsha, volonter bolý, eń aldymen, naǵyz otanshyl azamat bolý, ıaǵnı, patrıot bolý degen sóz. Sondaı-aq Memleket basshysy ekologııany jaqsartýǵa kásiporyndar men kásipkerler zor úles qosyp jatqanyna toqtaldy. Prezıdent «Taza Qazaqstan» aıasynda óte aýqymdy jumys atqarylǵanyn, mıllıondaǵan tonna qoqys jınalyp, kóshet egilgenin tilge tıek etti. Bul rette «Búkil qazaqstandyq aǵash egý kúni» aktsııasynyń jaqsy dástúrge aınalǵanyn jetkizdi.
– Osy shara sheńberinde búkil elimiz boıynsha sońǵy úsh kúnde 4,5 mıllıonǵa jýyq kóshet egilip, orman alqabymyzdy toltyrdy. Aınalamyzdy jınaý, aǵash otyrǵyzý arqyly biz jaıly da taza qorshaǵan orta qalyptastyramyz. Barlyq aýla men kósheni, saıabaq pen alańqaıdy uqypty ustaý – óz qolymyzda. Tazalyq pen tártip – durys ómir saltyn ustanýdyń basty kórinisi, – dedi Memleket basshysy.
Qasym-Jomart Toqaev tabıǵatty aıalaý, tazalyq mádenıetin árbir azamattyń, ásirese, jas urpaqtyń sanasyna sińirý ózekti dep sanaıdy.
– Mysaly, qoqysty suryptaý, sý men jaryqty únemdeý, qoǵamdyq oryndy búldirmeý – asa mańyzdy. Bul bizdiń qoǵamnyń qalypty qaǵıdatyna aınalýy qajet. Ekologııalyq aǵartý isine aıryqsha mán bergen jón. Muny «Taza Qazaqstan» kampanııasynyń negizgi baǵyttarynyń biri deýge bolady. Ýaqyt ótken saıyn kóptegen adamdardyń qorshaǵan ortany aıalaýǵa, qorǵaýǵa umtylyp jatqanyn kórip otyrmyz. Azamattarymyz ekologııalyq talaptardy saqtap, ony sanaly túrde ómir saltyna aınaldyryp keledi. Men jańa ǵana kórmeni araladym. Onda ekologııaǵa mán bergen kásiporyndarymyzdyń jumystary qoıylǵan. Olarǵa rızashylyǵymdy bildiremin. Qoǵamda jańa ekologııalyq mádenıet qalyptasyp jatyr. Tutas eldiń sana-sezimi ózgere bastady. Jastarymyz muny tereń túsinedi, – dedi Prezıdent.
Memleket basshysy jastar usynǵan jobalarmen tanysqanyn jetkizip, ár bastamadan týǵan elge, tabıǵatqa degen qamqorlyq baıqalatynyna nazar aýdardy.
Dana Esenǵalı men Kamıla Qyshqashbaevanyń jobalaryna toqtalyp, budan qazaq jastarynyń jasampaz bolmysy kórinetinin, el men jerge shynaıy janashyrlyǵy bilinetinin málim etti. Sonymen qatar Qazaqstannyń bolashaǵy osyndaı sanasy sergek, oıy ushqyr jastardyń qolynda ekenin basa aıtty.
– Bizdiń Qazaqstannan basqa Otanymyz joq. Týǵan jerimizdi eshkim syrttan kelip tazalap, kórkeıtip bermeıdi. Otanymyzdy taza ustaý – ár azamattyń qasterli paryzy. Sońǵy jyldary elimizde kóptegen mańyzdy ózgeris boldy. Ádiletti memleket bolý úshin biz zań men tártipke baǵynatyn qoǵam quryp jatyrmyz. Sondaı-aq aýqymdy reformalar júrgizilip jatyr. Munyń bári, eń aldymen, óskeleń urpaq úshin, ıaǵnı, sizder úshin jasalýda. Qazaq jastarynyń bolashaǵy – jarqyn, joly – ashyq. Men sizderge senemin, zor úmit artamyn! Otanshyl, bilimpaz, eńbekqor bolyńyzdar dep tileımin. Sonda Qazaqstanymyz da Ádiletti, Taza, Qaýipsiz jáne Órkendegen ozyq el bolmaq. Bárińizge sáttilik tileımin, – dedi Qasym-Jomart Toqaev.
Osyǵan deıin Prezıdent «Taza Qazaqstan» ekofestıvaline arnalǵan kórmeni tamashalaǵan bolatyn.