Taza Qazaqstan: Batys Qazaqstan oblysynda 228 myń kóshet otyrǵyzylady
ORAL. KAZINFORM – Búgin barlyq oblys boıynsha «Taza Qazaqstan» respýblıkalyq aktsııasy aıasynda jappaı aǵash otyrǵyzý boıynsha ekologııalyq naýqan bastaldy. Memleket basshysy da Astana qalasyndaǵy «Jastar» saıabaǵynda ekobelsendilermen birge aǵash ekti.
Batys Qazaqstan oblysy da atalǵan aktsııaǵa qosyldy.
Jospar boıynsha, óńirde bıyl 228 myń aǵash otyrǵyzý kózdelýde, onyń ishinde shamamen 5 myńǵa jýyǵy oblys ortalyǵy — Oral qalasynda egilmek.
Búgin ekologııalyq aktsııa aıasynda Tuńǵysh Prezıdent alańynda 55 aǵash otyrǵyzyldy.
Іs-sharaǵa qatysqan BQO ákimi Narıman Tóreǵalıev ekologııalyq aktsııanyń tek kógaldandyrý men aýmaqty abattandyrý ǵana emes, tabıǵatqa jaýapkershilikpen qaraý mádenıetin qalyptastyrýǵa qosatyn úlesin atap ótti.
– Bul tek abattandyrý sharasy emes, sonymen qatar halyqtyń ekologııalyq mádenıetin arttyrýǵa, týǵan jerge janashyrlyq tanytýǵa baǵyttalǵan mańyzdy qadam. Biz bul isti birigip, júıeli túrde oblystyń barlyq aýdan-qalalarynda abattandyrý men tazalyq jumystaryn júrgizýimiz qajet. Árbir mekeme, uıym jáne eldi mekender bul aktsııaǵa belsendi qatysatynyna senimdimin, - dedi oblys ákimi.
«Taza Qazaqstan» ekologııalyq aktsııasy 2023 jyldan bastap Memleket basshysynyń bastamasymen ótkizilip keledi jáne aktsııa elimizdiń jasyl qoryn qalpyna keltirý men kóbeıtýge, ekologııalyq jaǵdaıdy jaqsartýǵa, qoqystan tazartýǵa jáne qoǵamnyń qorshaǵan ortaǵa degen jaýapkershiligin arttyrýǵa baǵyttalǵan.
