«Taza Qazaqstan» bastamasyna el boıynsha 6,9 mln-nan astam adam qatysty
ASTANA. KAZINFORM- «Taza Qazaqstan» jalpyulttyq ekologııalyq bastamasy búkil el boıynsha 6,9 mln-nan astam adamdy biriktirdi. Birlesken kúsh-jigermen 1,1 mln gektar aýmaq tazartylyp, 844 myń tonna qaldyq jınalyp, shyǵaryldy, dep habarlaıdy QR Ekologııa jáne tabıǵı resýrstar mınıstrliginiń baspasóz qyzmeti.
Baspasóz qyzmetiniń málimetterine qaraǵanda, elde sondaı-aq 1,3 mln-nan astam tal otyrǵyzyldy.
Jyl basynan beri 753 ekologııalyq is-shara ótkizildi. Oǵan azamattar, eriktiler, jastar, memlekettik organdardyń, bıznes pen qoǵamdyq uıymdardyń ókilderi qatysty.
-Bastamanyń mańyzdy baǵyttarynyń biri – erte jastan ekologııalyq mádenıetti qalyptastyrý. «Jasyl balabaqsha» jobasy aıasynda ekologııalyq baǵyttaǵy 295 mektepke deıingi uıym quryldy. Al mektepterde ekologııalyq tárbıe boıynsha 158 myńnan astam synyp saǵaty ótkizildi,- delingen habarlamada.
Qoǵamdyq ekologııalyq baqylaý da belsendi damyp keledi. TazaQazBot Telegram-chat-boty arqyly sanıtarlyq jaǵdaı men aýmaqtardy abattandyrý máseleleri boıynsha 59,6 myń ótinim kelip tústi.
-«Taza Qazaqstan» – bul jaı ǵana ekologııalyq aktsııalar emes, tazalyqqa, tabıǵatqa jaýapkershilikpen qaraýǵa jáne ekologııalyq mádenıetti qalyptastyrýǵa degen ortaq umtylys,-dep jazady mınıstrlik.
Osyǵan deıin elde ekologııalyq bilim berýdiń biryńǵaı standarty ázirlengeni týraly jazdyq.
