«Taza Qazaqstan» balabaqshadan bastalady: Balalarǵa qandaı qundylyqtar úıretiledi
ASTANA. KAZINFORM — Ekologııalyq bilim berýdiń biryńǵaı standarty ázirlendi. Bul týraly Quryltaı depýtattarynyń saýalyna Premer-mınıstr Oljas Bektenovtiń jaýabynda aıtylǵan.
Úkimet basshysynyń atap ótýinshe, 2024 jyldan bastap Memleket basshysynyń «Taza Qazaqstan» bastamalaryn iske asyrý jáne onyń qaǵıdattaryn bilim berý uıymdaryndaǵy oqý-tárbıe jumysynyń júıesine engizý jumysy belsendi ári kezeń-kezeńimen júrgizilip jatyr.
— Memleket basshysynyń «Taza Qazaqstan» respýblıkalyq ekologııalyq aktsııasy barysynda bergen tapsyrmalary bıyl 21 qyrkúıekte meniń tóraǵalyǵymmen ótken keńeste qaraldy. Oǵan múddeli memlekettik organdar qatysyp, bilim berý uıymdaryndaǵy tárbıe jumysyn «Taza Qazaqstan» tujyrymdamasynyń qaǵıdattaryna sáıkes jetildirý máseleleri talqylandy. Búgingi kúni jastardyń jańa qoǵamdyq mádenıetin qalyptastyrý maqsatynda «Taza Qazaqstan» qaǵıdattary «Adal azamat» biryńǵaı tárbıe baǵdarlamasy aıasynda iske asyrylyp, Mektepke deıingi, orta, tehnıkalyq jáne kásiptik, joǵary jáne joǵary oqý ornynan keıingi bilim berý uıymdarynyń memlekettik jalpyǵa mindetti bilim berý standarttary men bilim berý baǵdarlamalaryna engizildi, — dedi ol.
Premer-mınıstrdiń aıtýynsha, tárbıe jumysynyń barlyq kesheni jas erekshelikterin eskere otyryp aıqyndalǵan jáne óskeleń urpaqtyń boıynda nıeti men is-áreketiniń tazalyǵy, adamdarǵa, eńbekke qurmetpen qaraý sııaqty rýhanı-adamgershilik qundylyqtardy, sondaı-aq «Taza Qazaqstan» qaǵıdattaryna sáıkes basqa da negizgi qundylyqtardy qalyptastyrýdy kózdeıdi.
— Mektepke deıingi uıymdarda jumys týǵan ólke men qorshaǵan ortaǵa degen súıispenshilikke, qamqorlyqqa, adaldyq pen eńbekqorlyqqa tárbıeleýge baǵyttalǵan. Búginde «Jasyl balabaqsha» jobasynyń aıasynda mektepke deıingi 288 uıymda ekologııalyq baǵyt damytylyp jatyr. Orta bilim berý uıymdarynda tárbıe komponenti men ekologııalyq mazmun jaratylystaný-ǵylymı baǵyttaǵy pánder (bıologııa, jaratylystaný, geografııa, hımııa, fızıka jáne t. b.) arqyly iske asyrylady jáne ekologııalyq saýattylyqty qalyptastyryp, qorshaǵan ortaǵa jaýapkershilikpen qaraýǵa baǵyttalǵan, — dedi Úkimet basshysy.
Oljas Bektenov mektepterde ekologııalyq mádenıetti qalyptastyrý «Jasyl mektep» ekojobasy jáne onyń aıasynda iske asyrylatyn «Jasyl sabaqtar» bilim berý jobasy arqyly qamtamasyz etiletinin aıtady.
— Mektepterdiń synyptan tys jumysy sheńberinde aǵa býyn ókilderine kómek jáne janýarlarǵa arnalǵan panajaılarǵa qoldaý kórsetýge, tabıǵı resýrstarǵa uqypty qaraýǵa, aýmaqtardy kógaldandyrý men abattandyrýǵa baǵyttalǵan «Qoǵamǵa qyzmet etý» volonterlik qyzmetin («Jer saǵaty», «Túlekterdiń aǵash egýi», «Tabıǵatqa qamqorlyq jasaımyz» jáne t. b. is-sharalar) qamtıtyn «Qamqor» áleýmettik jobasy kózdelgen, — dedi Premer-mınıstr.
Oljas Bektenov sondaı-aq ekologııalyq birlestikteriniń jelisi damyp kele jatqanyn aıtty.
— Bul rette qosymsha bilim berý júıesinde balalardyń ekologııalyq birlestikteriniń jelisi (125 myń jas ekologty biriktiretin shamamen 4,4 myń «jasyl» klýb jumys isteıdi) damyp keledi. 2025-2026 oqý jylynda 44 myńǵa jýyq ekologııalyq is-shara (mektepishilik, aýdandyq, qalalyq, óńirlik deńgeıde) ótkizilip, olarǵa júzdegen myń bilim alýshy, pedagog jáne ata-ana qatysty, — dedi Oljas Bektenov.
Buǵan deıin Ekologııalyq bilim berýdiń biryńǵaı standarty ázirlengenin jazǵan edik.
