«Taza Qazaqstan» aýqymdy ekologııalyq qozǵalysqa aınaldy - Oljas Bektenov

ASTANA. KAZINFORM — Qazaqstannyń Premer-mınıstri Oljas Bektenov Manjerok qalasynda (Altaı Respýblıkasy) ótken birinshi Halyqaralyq ekologııalyq konferentsııada sóz sóıledi.

Plenarlyq otyrysta sóılegen sózinde Oljas Bektenov ekologııalyq qaýipsizdik álemdik «jasyl» kún tártibiniń bir bóligi ǵana emes, kez kelgen eldiń ornyqty damýy úshin mańyzdy shart ekenin atap ótti.

Qazaqstanda qorshaǵan ortany qorǵaý jónindegi sharalar júıeli túrde qabyldanady. Prezıdent Qasym-Jomart Toqaevtyń tapsyrmasy boıynsha «Taza Qazaqstan» baǵdarlamasy qarqyndy túrde júzege asyrylýda. Búginde ol aýqymdy ekologııalyq qozǵalysqa jáne qazaqstandyqtardyń kúndelikti ómiriniń ajyramas bólshegine aınaldy. Tabıǵatqa, týǵan jerge uqypty qaraý mádenıetin qalyptastyrýǵa baǵyttalǵan bul bastama aıasynda tabıǵı aýmaqtardy, sý qoımalarynyń jaǵalaýlaryn tazartý jáne aǵash otyrǵyzý boıynsha ekoaktsııalar turaqty túrde uıymdastyrylyp turady.

Sondaı-aq, Úkimet ekologııalyq zańnamany jańǵyrtýda, tabıǵat qorǵaý salasyna ozyq tehnologııalardy engizýde, ekologııalyq baqylaýdy tsıfrlandyrýda. Bıoalýantúrlilikti qorǵaý qory qurylýda, erekshe qorǵalatyn aýmaqtar jelisi damytylýda, toǵaı buǵysy, qulan, arqar, qaraquıryq jáne qar barysy sııaqty sırek kezdesetin jáne joıylyp bara jatqan janýarlar túrleriniń popýlıatsııasy qalpyna keltirilýde. Turan jolbarysy men Prjevalskıı jylqysyn reıntrodýktsııalaý jumystary júrgizilýde.

Aıta keteıik, «Taza Qazaqstan» aktsııasyna 9 mıllıon adam qatysty.