«Taza Qazaqstan»: Atyraýda bir kúnde 1 myńǵa jýyq kóshet egildi
ATYRAÝ. KAZINFORM – Atyraýda «Taza Qazaqstan» jalpyulttyq aktsııasy aıasynda 1 myńǵa jýyq kóshet egildi.
Kóshet egý aktsııasy Atyraý qalasyndaǵy «Otbasy» saıabaǵynda ótti. Oǵan qatysqandardyń deni – munaı-gaz ónerkásibiniń qyzmetkerleri. Aktsııaǵa úles qosqandardyń arasynda qala turǵyndary, sportshylar men stýdentter bar.
Atyraý oblystyq ekologııa departamentiniń bas mamany Aqtolqyn Qaldybaevanyń pikirinshe, qorshaǵan ortaǵa janashyrlyq tanytatyn mundaı is-sharanyń mańyzy zor.
«Óıtkeni, aktsııanyń maqsaty – ekologııalyq mádenıetti qalyptastyrý. Osy maqsatta Atyraý qalasy men 7 aýdanda kóshet egý, qorshaǵan ortany tazalaý jumystary ár senbi saıyn uıymdastyrylyp keledi. Al, tabıǵatty jasyl jelekke bóleýdiń birden-bir joly – kóshetterdi kóptep egý. Birinshiden, bul ekologııalyq ahýaldy jaqsartady. Ekinshiden, atmosferalyq aýa sapasyna da oń yqpal etedi», -deıdi Aqtolqyn Qaldybaeva.
Eske sala ketelik, buǵan deıin «Taza Qazaqstan» aktsııasy aıasynda Atyraýda bir kúnde Jaıyq jaǵalaýynan 50 tonna qoqys jınalǵanyn habarlaǵan bolatynbyz.
«Info tsentr» qoǵamdyq birlestiginiń dırektory Zamanbek Quraqbaıdyń málimetinshe, osy kezge deıin 13 senbilik ótkizilip, oǵan 45 myńnan astam adam qatysqan. Al, arnaıy polıgondarǵa 1500 tonnadan astam qoqys shyǵarylǵan.
