«Taza Qazaqstan»: astanalyqtardan onlaın-platformaǵa 3000-nan asa ótinim tústi

ASTANA. KAZINFORM — Elorda turǵyndary abattandyrý, kógaldandyrý, joldardy jóndeý máseleleri boıynsha ótinimderdi «Taza Qazaqstan» onlaın-platformasy arqyly joldaı alady, dep habarlaıdy Astana qalasy ákimdiginiń resmı saıty.

Ákimdik atap ótkendeı, qyzmet qala turǵyndary arasynda úlken suranysqa ıe.

— Árbir qala turǵyny «Taza Qazaqstan» platformasynda abattandyrýǵa qatysty óz problemasyn jetkize alady. Júıe iske qosylǵannan beri 3158 ótinim túsken, onyń 2803-i oryndaldy, taǵy 39-y — iske asý satysynda, qalǵandary — qaralý ústinde, — delingen habarlamada.

Ótinimderde kóterilgen negizgi máseleler — aýmaqtardy abattandyrý, jaryqtandyrý, joldardy jóndeý, kógaldandyrý, ruqsatsyz qoqys úıindilerin joıý.
Barlyq eskertý der kezinde qaralyp, turǵyndarǵa qolaısyzdyqty azaıtýǵa múmkindik beredi.

«Taza Qazaqstan» portalynyń basty artyqshylyǵy — turǵyndarmen jyldam ári ashyq ózara baılanys ornatýynda.

Osyǵan deıin «Taza Qazaqstan – Taza Jezqazǵan» baıqaýynyń úzdikteri marapattalǵanyn jazǵanbyz.