Taza Qazaqstan: Astanada Stop Musor ekosenbiligi ótti

ASTANA. KAZINFORM — Respýblıkalyq «Taza Qazaqstan» ekologııalyq bastamasyn qoldaý maqsatynda jáne Stop Musor jobasy aıasynda elordadaǵy Qarasý ózeniniń jaǵalaýynda senbilik ótti, dep habarlaıdy Astana ákimdiginiń resmı saıty.

Stop Musor jobasy 2020 jyldan beri júzege asyrylyp keledi. Onyń maqsaty — halyqtyń ekologııalyq saýattylyǵyn arttyrý, jaýaptylyq pen qaldyqtardy kádege jaratý mádenıetin qalyptastyrý, sondaı-aq qalalardaǵy qoqys deńgeıin azaıtý.

Ekosenbilik respýblıkalyq «Taza Qazaqstan» aktsııasyn qoldaý úshin uıymdastyrylyp, elimizdiń Konstıtýtsııasynyń 30 jyldyǵyna arnaldy.

Sharany uıymdastyrýshylar — «Qazaqstannyń ekologııalyq uıymdary qaýymdastyǵy» zańdy tulǵalar birlestigi, Astana qalasynyń ákimdigi jáne «Jas Ulan» biryńǵaı balalar men jasóspirimder uıymy.

Negizgi maqsat — tek Qarasý ózeni mańyn qoqystan tazartý ǵana emes, sonymen qatar qala turǵyndary arasynda tabıǵatty aıalaý mádenıetin qalyptastyrý.

— Búgingi senbilik ulttyq «Taza Qazaqstan» aktsııasy aıasynda ótip, Konstıtýtsııanyń 30 jyldyǵyna arnaldy. Ekologııalyq sanaly kózqaras qarapaıym qadamdardan bastalady — qaldyqtardy suryptaý, senbilikterge qatysý. Búgin Astana jastary osy jaýapkershilikti óz moınyna alýǵa daıyn ekenin kórsetti. Biz úshin mundaı sharalar bir rettik emes, dástúrge aınalyp, qorshaǵan ortaǵa qamqorlyq mádenıetin qalyptastyrǵany mańyzdy, — dedi Qazaqstannyń ekologııalyq uıymdary qaýymdastyǵynyń basqarma tóraıymy Aıgúl Soloveva. 

Aıta ketelik Astanada Kishi Taldykól kólin tazalaý jumysy júrgizildi.