«Taza Qazaqstan»: Astanada Kishi Taldykól kólin tazalaý jumysy júrgizildi

ASTANA. KAZINFORM – Elordada «Taza Qazaqstan» respýblıkalyq aktsııasy aıasynda Kishi Taldykól kóliniń №5 jáne №7 ýchaskelerinde ekologııalyq is-shara ótti, dep habarlaıdy elorda ákimdiginiń resmı saıty.

Atalǵan is-sharanyń maqsaty – sý aıdynyn bıologııalyq turǵyda tazartý jáne qalpyna keltirý. 

Kishi Taldykóldi tazalaý jumysyna volonterler, jaqyn mańdaǵy turǵyn úı keshenderiniń turǵyndary, ekobelsendiler, elordanyń Nura aýdany ákimdiginiń ókilderi men Qorshaǵan ortany qorǵaý jáne tabıǵatty paıdalaný basqarmasynyń mamandary qatysty. 

Aktsııaǵa qatysýshylar EM-sharlardy sýǵa jiberýge kómektesti. Bul – qorektik zattar men paıdaly bakterııalarǵa baı tıimdi mıkroaǵzalar qosylǵan saz balshyq sharlary. Olar kól túbine túsken soń birtindep erıdi, osylaısha uzaq merzimge tazarýǵa kómektesip, sý aıdynynyń tabıǵı bıoteńgerimin qalpyna keltiredi. Sonymen qatar artyq baldyrlar men kól jaǵasyndaǵy qoqysty jınaý boıynsha sanıtarlyq jumys júrgizildi. 

Ekologııalyq aktsııa 2025 jyldyń basynan beri júrgizilip kele jatqan Kishi Taldykóldi qalpyna keltirýge baǵyttalǵan keshendi jumystyń bir bóligi boldy. Onyń maqsaty – lastaný deńgeıin azaıtý, tabıǵı tepe-teńdikti qalpyna keltirý jáne elorda turǵyndary arasynda tabıǵatty lastamaý mádenıetin qalyptastyrý.

Eske salsaq, buǵan deıin Qyzylordada «Taza Qazaqstan» ekologııalyq jobasy aıasynda Qarmaqshy aýdanynda birqatar joba júzege asyrylyp jatqanyn jazǵan edik.