Taza Qazaqstan: «Almaty Jazy» aktsııasy bastaldy
ALMATY. KAZINFORM – Memleket basshysynyń bastamasymen «Taza Qazaqstan» jalpy respýblıkalyq aktsııasyn iske asyrý jáne «Almaty – bizdiń ortaq úıimiz» naýqanyn jalǵastyrý aıasynda 26 maýsym men 6 shilde aralyǵynda sýburqaqtardy, ózender men sý aıdyndary jaǵalaýlaryn, aryq jelisi, qoqys alańdary, aǵashty sanıtarlyq maqsatta kesý, jol ınfraqurylymyn (aıaldama keshenderi, baǵdarsham nysandary, jol kórsetkishteri men belgileri) tazartý boıynsha «Almaty jazy» aktsııasy bastaldy.
Almaty ákimdiginiń málimetinshe, megapolıste 150 sýburqaq bar. Onyń 66-sy kommýnaldyq. Qazir alty fontan qaıta jańartylyp jatyr. 84-i jeke aýmaqta.
Kommýnaldyq menshiktegi sýburqaqtar 1 mamyrdan 25 qazanǵa deıin kún saıyn saǵat 8:00-den 23:00-ge deıin profılaktıkalyq is-sharalar (tazalaý, jabdyqtardy tekserý) kezinde óshirilip, kestemen jumys isteıdi. Sýburqaqty tazalaý kestesine sáıkes, sýburqaqtyń sýy aı saıyn aǵyzylyp, jabdyqtar tekserilip, arnaıy quraldarmen tostaǵany jýylyp, tazartylady. Keıde kommýnaldyq sýburqaqtar apattyq-qalpyna keltirý jumysyn júrgizý jáne aǵymdaǵy jóndeý (kabeldi aýystyrý, sorǵylar men qozǵaltqyshtardy aýystyrý nemese jóndeý, gıdrooqshaýlaý, qaptamany jóndeý) úshin óshiriledi. Alaıda, jeke aýmaqta ornalasqan sýburqaqtardyń jaǵdaıy máz emes, qaraýsyz qalǵan, jumys istemeıdi nemese menshik ıesinde qarjynyń bolmaýyna baılanysty kúrdeli jóndeýdi talap etedi.
Sondyqtan «Almaty jazy» aktsııasy aıasynda jeke sýburqaqtar qalalyq nysandarmen birge retke keltiriledi. Aktsııa barysynda uzyndyǵy 1525 km qalanyń aryq jelilerin tazartý jumystary kúsheıtiledi. Kún saıyn aryq jelisinen shamamen 250 tekshe metr laı jáne qoqys shyǵarylady.
«Júrgizilip jatqan sharalarǵa qaramastan, aryqtar nóser jańbyr kezinde turǵyndar tastaǵan qoqystarmen, qaldyqtarmen bitelip, jergilikti sý tasqynyna sebep bolyp otyr. Buryn habarlanǵandaı, tazartý jumystary kezinde kommýnaldyq qyzmet aryqtan jańbyr sýynyń kedergisiz aǵyp ketýine kedergi keltiretin paıdalanylǵan jórgekterdi, eski zattardy, ydys-aıaqty, tipti úlken kólemdi zattardy – kólik dóńgelekteri men qurylys qoqystaryn taýyp alǵan», - dep habarlady ákimdikten.
«Almaty jazy» aktsııasy aıasynda 624 aıaldama keshenin, 222 baǵdarsham nysanyn, 2 181 jol belgilerin shańnan jáne lastanýdan tazartý (jýý), ózen jaǵalaýy men sý aıdyndary aýmaǵyndaǵy shamamen 250 sharshy km jerdi qoqystan tazartý josparda.
Jazǵy kezeńde aýlaishilik aýmaqta qoqys konteınerleriniń tez tolýy ózekti másele bolyp otyr. Osyǵan baılanysty 1 454 konteınerlik alańdy sanıtarlyq óńdeý, 700 konteınerlik alańdy jýý jáne dezınfektsııalaý, sondaı-aq 24 747 kóshe jáne aýladaǵy qoqys jáshikteri tazartylady.
«Jazǵy maýsymdyq is-sharanyń biri aǵashtardy sanıtarlyq maqsatta kesý. Apatty jaǵdaıdaǵy aǵash adamǵa jáne múlikke úlken qaýip tóndiredi. Osyǵan baılanysty aýrý jáne qýraǵan aǵashtyń butaqtaryn sanıtarlyq maqsatta kesý daýyl, qatty jel men nóser kezinde butaqtardyń qulaý qaýpin azaıtady. «Almaty jazy» aktsııasy barysynda 6 myńǵa jýyq aǵashty sanıtarlyq maqsatta kesý josparlanyp otyr», - delingen habarlamada.
Osylaısha, «Almaty jazy» aktsııasy «Almaty – bizdiń ortaq úıimiz» naýqanynyń jazǵy ýaqyttaǵy jalǵasy bolady. Esterińizge sala keteıik, «Almaty – bizdiń ortaq úıimiz» naýqanynyń basty maqsaty – qalalyq ınfraqurylym men ortaq múlikke uqypty qaraý qundylyǵyn qalyptastyrý, el arasynda joǵary azamattyq jaýapkershilik pen ekologııalyq mádenıetti tárbıeleý, jeke ekologııalyq bastamalardy qoldap, olardy iske asyrýǵa jaǵdaı jasaý.
Osyǵan deıin Prezıdent Taza Qazaqstan — kózboıaýshylyq jasaıtyn senbilik emes ekenin eskertken edi.
Keıin Memleket basshysy Qasym-Jomart Toqaev «Taza Qazaqstan» respýblıkalyq ekologııalyq aktsııasy aıasynda uıymdastyrylǵan jalpyqalalyq senbilikke qatysyp, elordadaǵy «Ulytaý» alleıasynda aǵash otyrǵyzǵan bolatyn.
