«Taza Qazaqstan»: Almatyda ekologııalyq mádenıetti qalyptastyrý úshin ne isteledi
ALMATY. KAZINFORM — Almatyda qala turǵyndary arasynda ekologııalyq mádenıetti qalyptastyrý úshin birqatar jumystar atqarylady.
Bıyl 28 sáýir kúni qalalyq máslıhat 2025–2029 jyldarǵa arnalǵan «Taza Qazaqstan» tujyrymdamasyn júzege asyrý boıynsha Almatydaǵy is-qımyl josparyn bekitti.
Jospar 2024 jyldyń 31 qazanyndaǵy Úkimettiń № 910 qaýlysymen bekitilgen 2024–2029 jyldarǵa arnalǵan «Taza Qazaqstan» ekologııalyq mádenıetti damytý tujyrymdamasyn iske asyrý jónindegi is-qımyl josparynyń negizinde ázirlengen.
Ony júzege asyrý Almaty qalasynyń ekologııa basqarmasyna júktelgen. Sondyqtan Kazinform agenttigi aıtylǵan vedomstvoǵa saýal joldap, máslıhat bekitken jospar boıynsha qandaı jumys atqarylatynyn naqtylady.
Basqarma jaýabyna sáıkes, jospardy júzege asyrýǵa arnaıy qarjy qarastyrylmaǵan, jumystar aǵymdaǵy jumystar aıasynda atqarylady. Jospar negizgi 3 baǵyttan turady. Olar:
1-baǵyt. Ekologııalyq oılaý, onyń ishinde ekologııalyq jaýaptylyqty yntalandyrý sharalary;
2-baǵyt. Ekologııalyq bilim berý;
3-baǵyt. Ekologııalyq aǵartý jáne ony aqparattyq jarııa etý.
— Bul 3 baǵyt boıynsha barlyǵy 45 tarmaqtan turatyn qysqa merzimdi jáne uzaq merzimdi is-sharalar qarastyrylǵan. Qysqa merzimdi maqsattar qatarynda ekologııalyq quqyq buzýdy tirkeýge arnalǵan kameralar sanyn kóbeıtý, qorshaǵan orta jaı-kúıiniń avtomattandyrylǵan monıtorıngin damytý, jasyl jelekterge túgendeý júrgizý, velosıped kóligin paıdalanýǵa arnalǵan jáne elektromobılderdi elektrmen zarıadtaıtyn stantsııalarǵa arnalǵan ınfraqurylym jasaý; qoǵamdyq kólikte jol júrýge arnalǵan keshbekter tóleý máselesin pysyqtaý maqsattary bar. Uzaq merzimdi maqsattar qalǵan 38 tarmaqty qamtıdy, — delingen Ekologııa basqarma basshysynyń orynbasary Madııar Qojekenovtyń jaýabynda.
Odan bólek vedomstvo ókili «Taza Qazaqstan» baǵdarlamasynyń «Almaty — bizdiń ortaq úıimiz» jobasy aıasynda megapolıste istelgen jumystardy atap ótti. Onyń aıtýynsha, qaladaǵy mektep oqýshylary men balabaqsha tárbıelenýshileri arasynda plastık qaqpaqtardy jınaý boıynsha ekoaktsııa uıymdastyrylyp, birneshe mıllıon plastık qaqpaq jınalǵan. Sonymen qatar Almatyda toqyma ónimderin jınaý jáne óńdeý boıynsha jańa ekologııalyq bastama iske qosylǵan. 1 aıdyń ishinde almatylyqtar 20 myńnan astam qajetsiz kıimdi ótkizgen.
— Naýryz aıynan sáýir aıy aralyǵynda «Taza kásip — taza aımaq» aktsııasy, «Taza jaǵalaý» aktsııasy, mektep oqýshylarymen birge ótkizilgen «Bolashaqty birge egemiz» aǵash otyrǵyzý aktsııasy, «Óz aǵashyńdy otyrǵyz» aktsııasy, túlekter arasynda ótken «Túlekterdiń aǵash egýi» ekochelendji, kásiporyndarǵa arnalǵan «Qalaǵa arnalǵan aǵash» aktsııasy, «Merzimi ótken dárini tapsyr — tabıǵatty saqta» aktsııasy, «Meıirimdi qaqpaqsha» aktsııasy, «Jasyl aýla» bastamasy, sondaı-aq «Taza aýla — taza qala/aýdan» baıqaýy ótkizildi. Jeńistiń 80 jyldyǵyna oraı senbilik uıymdastyryldy. Oǵan 50 myń adam qatysyp, 10 myń m³ qoqys jınaldy. 439 jasyl kóshet otyrǵyzyldy, — dedi Madııar Qojekenov.
Qazirgi ýaqytta Almatyda avtokóliktiń aýany lastanýyna qarsy baǵyttalǵan «Taza aýa» aktsııasy bastaldy. 19 turaqty jáne 3 jyljymaly ekobekette kólikterge baqylaý júrgizilip jatyr.
Eske salaıyq, buǵan deıin memlekettik keńesshi Erlan Qarın «Taza Qazaqstan» ekoaktsııasynyń ıdeologııasy — tazalyq pen tártipti saqtaý ekenin aıtqan edi.