«Taza Qazaqstan» aktsııasyna 9 mıllıon adam qatysty
ASTANA. KAZINFORM – «Taza Qazaqstan» aktsııasy aıasynda byltyrdan beri el boıynsha 1,4 mln tonna qaldyq jınalyp, 2,4 mln aǵash otyrǵyzyldy. Aktsııaǵa shamamen 9 mln adam qatysqan, onyń ishinde 450 myń erikti bar. Bul tsıfrlardy QR Ekologııa jáne tabıǵı resýrstar vıtse-mınıstri Mansur Oshýrbaev málimdedi.
− 2024 jyldan bastap jáne 2025 jyldyń alǵashqy 6 aıynda «Taza Qazaqstan» tujyrymdamasy aıasynda elimizde 874 is-shara ótkizildi. Olardyń qatarynda respýblıkalyq «Taza kásip – taza aımaq», «Kıeli meken», «Taza ólke», «Móldir bulaq» jáne «Jer saǵaty», «Qustardyń halyqaralyq kúni» sekildi halyqaralyq aktsııalar bar. Osylaısha 1 mln 414 myń tonna qaldyq jınalyp, eldi mekenderde 2,4 mln astam aǵash otyrǵyzyldy. Barlyq aktsııany qosyp sanaǵanda qatysýshylardyń jalpy sany 9 mln adamdy qurdy, onyń ishinde 450 myń volonter bar, - dedi M. Oshýrbaev Prezıdent janyndaǵy Ortalyq kommýnıkatsııalar qyzmetinde ótken brıfıngte.
Onyń aıtýynsha, «Taza Qazaqstan» – bir kúndik aktsııa emes, elimizdiń árbir turǵynyn tabıǵatty qorǵaýǵa, qorshaǵan ortany taza ustaýǵa jáne ekologııalyq mádenıetti kúndelikti daǵdyǵa engizý úshin arnalǵan memlekettik baǵdarlama.
− «Taza Qazaqstan» bastamasy tek qoqys jınaýmen nemese aǵash otyrǵyzýmen shektelmeıdi. Bul – áldeqaıda tereń ári aýqymdy joba. Onyń basty maqsaty – qoǵamda ekologııalyq bilim men mádenıetti qalyptastyrý. Bizdiń basty maqsatymyz – árbir azamattyń, ásirese jas býynnyń tabıǵatqa kózqarasyn ózgertý. Biz úshin qorshaǵan ortany qorǵaý men oǵan uqypty qaraý tek mindet emes, kúndelikti ómir saltymyzdyń ajyramas bóligine aınalýy kerek, - dedi vıtse-mınıstr.
Spıker balalarǵa aǵash ósirý daǵdylaryn úıretý jumystary júrgizilip jatqanyn atap ótti. Bul olarǵa kishkentaı tuqymnyń tolyqqandy aǵashqa aınalýy úshin qansha ýaqyt qajet ekenin túsinýge kómektesedi. Bıyl elimiz boıynsha 236 mektepten 12 myńnan astam oqýshy 36 myń tuqym otyrǵyzǵan.
Aıta keteıik, «Taza Qazaqstan» tujyrymdamasy aıasynda QR Prezıdentiniń Teleradıokesheni «Taza qala» telejobasynyń ekinshi maýsymyn bastady jáne elimizdiń monoqalalarynyń jaı-kúıine basymdyq berdi.
Keshe túsirilim toby Qostanaı oblysyndaǵy óndiristik qala – Lısakovtyń tynys-tirshiligin kórsetti.