«Taza Qazaqstan» aktsııasyna 7 mln adam qatysyp, 130 myń gektar jer tazartyldy – Prezıdent
ASTANA. KAZINFORM – «Taza Qazaqstan» ekologııalyq bastamasy el kóleminde aýqymdy qoǵamdyq qozǵalysqa aınaldy. Jyl basynan beri 600-den astam ekologııalyq is-shara ótkizilip, oǵan 7 mln adam qatysty. Osy kezeńde 130 myńnan astam gektar jer tazartylyp, 1,3 mln tal egilgen. Bul týraly Memleket basshysy Qasym-Jomart Toqaev Prezıdent saıabaǵynda ótken Taza Qazaqstan» ekologııalyq aktsııasynda aıtty.
Prezıdenttiń aıtýynsha, «Taza Qazaqstan» jobasynyń maqsaty – elimizdi kórkeıtý, ultymyzdy ortaq iske jumyldyrý arqyly yntymaq-birligimizdi kúsheıtý.
– Búginde Qazaqstannyń ár aımaǵynda aýqymdy jumys júrip jatyr. Jyl basynan beri elimiz boıynsha 600-den astam túrli ekologııalyq is shara ótti. Osy mańyzdy jumysqa 7 mln adam qatysty, 130 myńnan astam gektar jer tazartyldy. Elimizde 1,3 mln tal egildi. Munyń bári az sharýa emes, shyn máninde kóp jumys istelip jatyr. Bul azamattarymyzdyń Otanymyzǵa degen taza nıeti, shynaıy qamqorlyǵy jáne eń bastysy eńbekqorlyq, – dedi Qasym-Jomart Toqaev Prezıdent saıabaǵynda.
Osy oraıda Memleket basshysy naqty iske belsene atsalysqan barlyq azamatqa alǵys aıtty.
– Osyndaı naǵyz otanshyl, patrıot azamattardy memleketimiz marapattaý kerek. Aldymyzda kele jatqan Táýelsizdiktiń mereıli toıynda bul qurmetti mindetti oryndaımyn, – dedi Prezıdent.
Aıta keteıik, Memleket basshysy Qasym-Jomart Toqaev «Taza Qazaqstan» ekologııalyq aktsııasyna qatysty jáne jas ekobelsendilermen birge Prezıdent saıabaǵy aýmaǵynda aǵash ekti.
Buǵan deıin Q. Toqaev elimizdiń árbir azamaty búgin de, erteń de taza Qazaqstanda jaıly ómir súrýi kerektigin aıtqan edi.
