«Taza Qazaqstan» aktsııasy aıasynda Aqtóbe óńirinde 7300-ge jýyq kóshet egildi
AQTÓBE. KAZINFORM — Búgin «Taza Qazaqstan» jalpyulttyq ekologııalyq aktsııasy óńirdegi 200-den asa eldi mekende uıymdastyryldy, dep habarlaıdy Aqtóbe oblysynyń ákimdigi.
Óńir basshysy Ashat Shaharov Altyn Orda shaǵyn aýdanyndaǵy «Densaýlyq» saıabaǵynda aǵash otyrǵyzý sharasyna qatysty. Senbilikke ardagerler keńesiniń músheleri, «Jastar rýhy» jastar qanatynyń ókilderi men jastar resýrstyq ortalyǵynyń qyzmetkerleri belsendi atsalysty. Olar saıabaq aýmaǵyn retke keltirip, aǵashtar otyrǵyzdy.
Senbilik barysynda 200 túp úıeńki men aq qaıyń kósheti otyrǵyzyldy. Jalpy óńir boıynsha 770 gektar aýmaqta barlyǵy 7 300 túp jasyl jelek egildi.
Aıta ketý kerek, 2021 jyldan beri oblys aýmaǵynda 332 myńnan astam aǵash otyrǵyzylǵan. Bıyl kóktemde taǵy 55 myń túp aǵash egildi. Al kúzgi maýsymda 113 myń kóshet otyrǵyzý josparlanyp otyr.
— Memleket basshysynyń tapsyrmasy boıynsha búginde elimizdiń barlyq óńirinde ekologııalyq jaǵdaıdy jaqsartýǵa jáne kógaldandyrýǵa baǵyttalǵan aýqymdy jumystar júrgizilip jatyr. Árbir turǵyn óz eldi mekeniniń tazalyǵy men kórkeıýine jeke jaýapkershilikpen qaraýy asa mańyzdy. Tek birlesken eńbektiń arqasynda biz naqty ári turaqty nátıjelerge qol jetkize alamyz. Mundaı senbilikter adamdardy biriktirip, ekologııalyq mádenıetti qalyptastyrady, tabıǵatqa uqypty kózqaras pen jaýapkershilik sezimin tárbıeleıdi, sondaı-aq qalalar men aýyldardyń kórkeıýine úles qosady, — dedi oblys ákimi.
Eske sala keteıik, Aqtóbe qalasynda 13 qyrkúıek pen 15 qarasha aralyǵynda «Taza Qazaqstan» aktsııasy aıasynda sanıtarlyq tazalaý boıynsha kúzgi eki aılyq ótip jatyr.