Aqmoladaǵy Zerendi demalys ornynan bir tonna qoqys shyǵaryldy
KÓKShETAÝ. KAZINFORM — Aqmolalyqtar «Taza Qazaqstan» aktsııasyna qatysty, dep habarlaıdy Aqmola oblysy ishki saıasat basqarmasynyń baspasóz qyzmeti.
Búginde Aqmola oblysy aýqymdy ekologııalyq qozǵalystyń qarqynymen ómir súrip jatyr. Myńdaǵan turǵyn qoldaryna kúrek pen kóshet alyp, jaqsy kóńil-kúımen kósheler men saıabaqtarǵa shyqty. Maqsat — qalalar men aýyldardy taza, jasyl ári jaıly etý.
Memleket basshysynyń bastamasymen qolǵa alynǵan «Taza Qazaqstan» ekologııalyq aktsııasy oblystyń barlyq aýdanyn qamtydy. Ár aımaqta bul bastama ózinshe óris alyp, erekshe reńkke ıe boldy.
Qosshy qalasynda jumys ertemen bastaldy. Memlekettik jáne jekemenshik uıymdar, qalalyq máslıhat depýtattary, kásipkerler, stýdentter men qarapaıym turǵyndar senbilikke belsene qatysty. Olar 250 jemis butasy men 150 qaraǵaı men qaıyń kóshetterin otyrǵyzdy. Qalaǵa balǵyn topyraq pen kók japyraqtyń ıisi tarap, qosshylyqtar ózderiniń jasyl bolashaǵyn óz qoldarymen qalyptastyryp jatty.
Zerendi aýdanynda da belsendilik joǵary boldy. Qaladaǵy tanymal shańǵy-roller bazasynda 500-ge jýyq adam jınaldy. Jazda rolık teýip, qysta shańǵy tebetin bul jer senbilik kúni qoqys jınalatyn belsendi alańǵa aınaldy. Birneshe júk kóligimen shamamen bir tonna qoqys shyǵaryldy. Aýdan ákiminiń orynbasary barlyq qatysýshyǵa alǵys aıtyp, Zerendi ormandarynyń tazalyǵyn saqtaý — bul óz týǵan jerin súıetin ár azamattyń boryshy ekenin eske saldy.
Kókshetaý jaǵalaýynda jańa aǵashtar paıda boldy. Kóshet otyrǵyzý sharasyna tanymal sportshy, MMA juldyzy Shavkat Rahmonov ta qatysty. Bul oqıǵa qala turǵyndary úshin úlken qýanyshqa aınaldy.
— Keremet aýa raıy, tamasha atmosfera! Mundaı bastamalar tek ekologııa úshin ǵana emes, ortaq kóńil-kúıimiz úshin de mańyzdy. Búgin biz birge qalamyzdy kórkeıtip jatyrmyz, — dedi Shavkat.
Kókshetaýda sáýir aıynyń ózinde 2000-ǵa jýyq aǵash otyrǵyzyldy. Sonymen qatar qalada ploggıng — qoqys jınaýmen qatar júretin ekologııalyq júgirý keńinen tanymal bola bastady. Senbilik kúnderindegi ploggerlik reıdter belsendi turǵyndar úshin jańa dástúrge aınalyp keledi.
Arshaly aýdanynda da jumys qarqyndy. Oblys ákimi Marat Ahmetjanov volonterler jáne depýtattarmen birge sport-saýyqtyrý kesheniniń mańynda qylqan japyraqty aǵashtar otyrǵyzdy.
— Ekologııa — bul bir rettik shara emes, bul ómir salty. Ol kishkentaı qadamnan bastalady, — dep atap ótti ol.
Jalpy, «Taza Qazaqstan» aıasynda oblys boıynsha 115 myńnan astam aǵash pen buta otyrǵyzyldy.
Astrahan aýdany ekologııalyq aktsııany Jeńistiń 80 jyldyǵymen ushtastyrdy. 2500-den astam adam senbilikke shyǵyp, 600 aǵash otyrǵyzyp, eldi mekenderdegi kósheler men saıabaqtardy tazalady.
Aqmola oblysynda mundaı mysaldar óte kóp. «Taza Qazaqstan» qarapaıym senbilik sheńberinen shyǵyp, tabıǵatqa janashyrlyq, týǵan jerge mahabbat pen taza ári jasyl ortada ómir súrýge degen umtylysty biriktirgen shynaıy qozǵalysqa aınaldy.
Osydan buryn memlekettik keńesshi Erlan Qarın Ulttyq quryltaıdyń jáne Jastar saıasaty jónindegi keńestiń bir top múshelerimen birge aǵash otyrǵyzǵany málim boldy.