Abaı oblysynda sanıtarlyq talaptardy buzǵandarǵa qatysty 7 786 hattama toltyryldy
SEMEI. KAZINFORM — «Taza Qazaqstan» jalpyulttyq baǵdarlamasy aıasynda Abaı oblysynda ekologııalyq quqyq buzýshylyqtardyń aldyn alýǵa baǵyttalǵan kezekti reıd ótti.
Jyl basynan beri abattandyrý qaǵıdalaryn buzý, ortaq paıdalanylatyn oryndardy lastaý, sondaı-aq qalalar men eldi mekenderdiń ınfraqurylym nysandaryn búldirý jáne jasyl jelekterdi joıý derekteri boıynsha 7 786 ákimshilik hattama toltyrylǵan.
Reıd Abaı oblysynyń ákimdigi, mamandandyrylǵan tabıǵat qorǵaý prokýratýrasy jáne oblystyq Polıtsııa departamentiniń birlesýimen uıymdastyryldy. Іs-shara barysynda bıznes ortalyqtary, saýda úıleri men jeke menshik nysandar tekserilip, kásipkerlerge aýmaqty abattandyrý jáne sanıtarlyq talaptardy saqtaý boıynsha túsindirý jumystary júrgizildi.
Oblystyń tabıǵı resýrstar jáne tabıǵat paıdalanýdy retteý basqarmasy tabıǵat qorǵaý baǵdarlamalaryn iske asyrý bóliminiń bas mamany Nurdaýlet Muqashovtyń aıtýynsha, reıdtiń negizgi maqsaty — eldi mekenderdiń sanıtarlyq tazalyǵyn saqtaý jáne kásipkerlerdiń jaýapkershiligin arttyrý.
— Reıdtiń basty maqsaty — qalanyń tazalyǵyn saqtaý, sanıtarlyq talaptardyń oryndalýyn baqylaý jáne kásipkerlerdiń jaýapkershiligin arttyrý. Zań talaptaryn buzǵandarǵa qatysty tıisti sharalar qabyldanýda, — dedi Nurdaýlet Muqashov.
Vedomstvonyń málimetinshe, jyl basynan beri 26 mln teńge kóleminde aıyppul óndirilgen.
Mamandandyrylǵan tabıǵat qorǵaý prokýratýrasynyń prokýrory Aıym Qabylova QR Ákimshilik quqyq buzýshylyq týraly kodeksiniń 505-babyna sáıkes alǵash ret anyqtalǵan quqyq buzýshylyq úshin eskertý beriletinin atap ótti.
— Eger bir jyl ishinde osy talap qaıta buzylsa, ákimshilik jaýapkershilik kúsheıtilip, zańnamaǵa sáıkes aıyppul salynady, — dedi prokýror.
Mamandardyń aıtýynsha, mundaı reıdter óńirdegi sanıtarlyq tazalyqty saqtaýǵa, ekologııalyq mádenıetti qalyptastyrýǵa jáne abattandyrý talaptarynyń saqtalýyn qamtamasyz etýge baǵyttalǵan.
