«Taza Qazaqstan»: Abaı oblysynda 7 myńǵa jýyq quqyqbuzýshylyqtyń joly kesildi
ASTANA. KAZINFORM —Halyq arasynda sanıtarlyq talaptardy saqtaý, qoǵamdyq oryndardyń tazalyǵyn qamtamasyz etý jáne ekologııalyq jaýapkershilikti arttyrý máseleleri boıynsha aqparattyq-túsindirý jumystary kúsheıtildi, dep habarlaıdy oblystyq PD baspasóz qyzmeti.
Abaı oblysynda «Taza Qazaqstan» respýblıkalyq bastama aıasynda qoǵamdyq tártipti nyǵaıtý, qorshaǵan ortanyń tazalyǵyn saqtaý jáne eldi mekenderdiń sanıtarlyq jaǵdaıyn jaqsartý baǵytynda júıeli ári aýqymdy jumystar júzege asyrylyp keledi.
— 2026 jyldyń basynan beri óńirde jalpy sany 6 870 quqyqbuzýshylyq deregi anyqtalyp, joly kesildi. Atap aıtqanda, ortaq paıdalanylatyn oryndardy lastaý faktileri boıynsha 551 quqyq buzýshylyq tirkelse, qalalar men eldi mekenderdiń aýmaqtaryn abattandyrý qaǵıdalaryn buzý, ınfraqurylym obektilerin búldirý, jasyl jelekterge zaqym keltirý sııaqty ekologııalyq tártipke qarsy áreketter boıynsha 6319 derek anyqtalǵan, — delingen habarlamada.
Sondaı-aq, quqyq buzýshylyqtar dronnyń kómegimen de anyqtalyp jatyr. Atalǵan baǵytta tek baqylaý sharalary ǵana emes, sonymen qatar aldyn alý jáne túsindirý jumystary da keń kólemde júrgiziledi. Polıtsııa qyzmetkerleri turaqty negizde reıdtik is-sharalar uıymdastyryp, aldyn alý maqsatynda júıeli monıtorıng júrgizedi.
Sonymen qatar, halyq arasynda sanıtarlyq talaptardy saqtaý, qoǵamdyq oryndardyń tazalyǵyn qamtamasyz etý jáne ekologııalyq jaýapkershilikti arttyrý máseleleri boıynsha aqparattyq-túsindirý jumystary kúsheıtildi. Bul bastamalar azamattardyń tabıǵatqa degen uqypty kózqarasyn qalyptastyrýǵa jáne qoǵamdyq mádenıetti damytýǵa baǵyttalǵan.
Buǵan deıin Aqtóbede ótken aýqymdy ekoaktsııada jastar qoqys jınap jarysqanyn jazdyq.
