«Taza Qazaqstan»: Abaı oblysynda 4105 quqyqbuzýshylyqtyń joly kesildi
ASTANA. KAZINFORM — Abaı oblysynda qoǵamdyq tártipti saqtaý men qorshaǵan ortanyń tazalyǵyn qamtamasyz etýge baǵyttalǵan respýblıkalyq «Taza Qazaqstan» aktsııasy júıeli túrde júzege asyrylyp keledi, dep habarlaıdy oblystyq PD baspasóz qyzmeti.
Atalǵan bastama eldi mekenderdiń sanıtarlyq jaǵdaıyn jaqsartýǵa, azamattardyń ekologııalyq mádenıetin arttyrýǵa jáne ortaq paıdalanylatyn aýmaqtardy uqypty saqtaýǵa baǵyttalǵan mańyzdy qoǵamdyq jobaǵa aınaldy.
Aktsııa aıasynda óńirde abattandyrý qaǵıdalaryn saqtaý, ınfraqurylym nysandaryn qorǵaý, qoǵamdyq oryndardy lastaýǵa jol bermeý, jasyl jelekter men saıabaqtardy saqtaý baǵytynda keshendi jumystar júrgizilýde.
— Jyl basynan beri Abaı oblysynyń aýmaǵynda 4105 ákimshilik quqyq buzýshylyqtyń joly kesildi. Bul kórsetkish quqyq qorǵaý organdary tarapynan qoǵamdyq tártip pen ekologııalyq talaptardyń saqtalýyna turaqty baqylaý júrgizilip otyrǵanyn aıǵaqtaıdy. Anyqtalǵan quqyq buzýshylyqtardyń bir bóligi Jedel basqarý ortalyǵynyń beınebaqylaý júıeleri arqyly tirkelgen. Qazirgi zamanǵy tsıfrlyq baqylaý quraldarynyń kómegimen quqyq buzýshylyqtardy der kezinde anyqtap, tıisti sharalar qabyldaý múmkindigi artyp otyr. Bul óz kezeginde qoǵamdyq oryndardaǵy tártipti kúsheıtip, azamattardyń jaýapkershiligin arttyrýǵa yqpal etedi, — delingen habarlamada.
Sonymen qatar, polıtsııa qyzmetkerleri profılaktıkalyq baǵyttaǵy jumystarǵa erekshe nazar aýdarýda. Ýchaskelik polıtsııa ınspektorlary turǵyndarmen kezdesýler ótkizip, sanıtarlyq talaptardy saqtaý, qoǵamdyq oryndardy taza ustaý jáne qorshaǵan ortaǵa uqypty qaraý máseleleri boıynsha túsindirý jumystaryn júrgizedi.
Polıtsııa qyzmetkerleriniń aıtýynsha, tazalyq máselesi tek kommýnaldyq qyzmetterdiń mindeti ǵana emes, árbir azamattyń ortaq jaýapkershiligi. Kóp jaǵdaıda quqyq buzýshylyqtar qarapaıym erejelerdi saqtamaýdan týyndaıdy. Sondyqtan turǵyndardyń ekologııalyq mádenıetin qalyptastyrý — quqyq buzýshylyqtardyń aldyn alýdyń mańyzdy tetikteriniń biri.
Abaı oblysynyń Polıtsııa departamenti turǵyndardy qorshaǵan ortaǵa janashyrlyqpen qarap, zań talaptaryn saqtaýǵa shaqyrady. Árbir azamat óz aýlasynan bastap tazalyqty qamtamasyz etse, qala men aýyldardyń kórki artyp, óńirdiń ekologııalyq ahýaly jaqsara túsedi.
Aktsııa sheńberinde tek quqyq buzýshylyqtardy anyqtaý ǵana emes, qoǵamda tazalyq pen tártip mádenıetin qalyptastyrý, azamattardyń qorshaǵan ortaǵa degen jaýapkershiligin arttyrý basty maqsattardyń biri bolyp otyr.
Osyǵan deıin Abaı oblysynyń turǵyny adam saýdasy úshin 6 jylǵa sottalǵanyn jazǵanbyz.
