«Taza Qazaqstan»: Abaı oblysynda 3600-den asa quqyqbuzýshylyqtyń joly kesildi
ASTANA. KAZINFORM — Quqyq buzýshylyqtardyń bir bóligi Jedel basqarý ortalyǵynyń (JBO) beınekameralary arqyly tirkelip, quqyq qorǵaý organdary tarapynan jedel sharalar qabyldandy, dep habarlaıdy oblystyq PD baspasóz qyzmeti.
Abaı oblysynda qoǵamdyq tártip pen ekologııalyq tazalyqty qamtamasyz etý maqsatynda respýblıkalyq «Taza Qazaqstan» aktsııasy júıeli túrde júzege asyrylyp keledi. Qalalar men eldi mekenderdi abattandyrý qaǵıdalaryn saqtaý, ınfraqurylym obektilerin qorǵaý, jasyl jelekter men saıabaqtardy buzbaý — aktsııanyń negizgi mindetteriniń biri bolyp otyr.
Jyl basynan beri oblys aýmaǵynda jalpy 3606 quqyq buzýshylyqtyń joly kesildi, onyń ishinde:
- Qalalar men eldi mekenderdiń aýmaqtaryn abattandyrý qaǵıdalaryn buzý, ınfraqurylym obektilerin búldirý, jasyl ekpelerdi joıý — 3325 fakti;
- Ortaq paıdalanylatyn oryndardy lastaý — 281 fakti.
Quqyq buzýshylyqtardyń bir bóligi Jedel basqarý ortalyǵynyń (JBO) beınekameralary arqyly tirkelip, quqyq qorǵaý organdary tarapynan jedel sharalar qabyldandy. Bul qoǵamdyq tártipti saqtaý jáne ekologııalyq mádenıetti arttyrý baǵytynda mańyzdy qadam sanalady.
Abaı oblysynyń Polıtsııa departamenti azamattarǵa ekologııalyq jaýapkershilikti arttyrýǵa baǵyttalǵan aqparattyq-túsindirý jumystaryn júrgizip jatyr. Halyqqa tazalyq pen tártipti saqtaý qajettiligi, qorshaǵan ortany qorǵaý men sanıtarlyq talaptardy oryndaýdyń mańyzy keńinen túsindiriledi.
«Taza Qazaqstan» aktsııasy — tek quqyq buzýshylyqtardy anyqtaý emes, sonymen qatar qoǵamda ekologııalyq mádenıetti qalyptastyrýǵa, qorshaǵan ortany saqtaý men qoǵamdyq abattandyrýǵa úles qosý sharasy.
Abaı oblysynyń Polıtsııa departamenti oblys turǵyndary men qonaqtaryna qoǵamdyq tártip pen tazalyq talaptaryn qatań saqtaýdy eskertedi.
— Qorshaǵan ortany lastaý, ortaq paıdalanylatyn oryndardy búldirý, jasyl jelekterdi joıý jáne abattandyrý qaǵıdalaryn buzý — zańmen jaýapkershilikke ákep soǵady. Árbir azamattyń ekologııalyq mádenıeti men jaýapkershiligi — óńirimizdiń kórkeıýi men tazalyǵynyń kepili. Taza aýla, taza kóshe, taza qala — ózimizden bastalady! Qorshaǵan ortany qorǵaý — barshamyzdyń ortaq mindetimiz, — deıdi tártip saqshylary.
Budan buryn Abaı oblysynda 51 keli esirtki zańsyz aınalymnan alynǵanyn jazdyq.
