«Taza Qazaqstan»: 4000 áke mektep aýlalaryn qardan tazartty
ASTANA. KAZINFORM — Astana mektepterinde «Taza Qazaqstan» aktsııasy aıasynda «200 mektep jáne balabaqsha – 4000 áke» qar kúreý ekochellendji ótti, dep habarlady elorda ákimdiginiń resmı saıty.
Іs-shara jaýapkershilik mádenıetin qalyptastyrýǵa, azamattyq belsendilikti arttyrýǵa jáne qaýipsiz orta qurýǵa baǵyttalǵan.
– Bul «Adal azamat» birtutas tárbıe baǵdarlamasy men respýblıkalyq «Taza Qazaqstan» bastamasy aıasynda uıymdastyrylyp otyr. «Ákege qarap ul óser» demekshi, mundaǵy maqsat – eńbek adamdarynyń qyzmetin baǵalaý, olardyń jumysyn balalarǵa túsindirý ári eńbekke baýlý. Bul balanyń boıynda jaýapkershilik, adamgershilik, adaldyq sekildi qasıetterdiń qalyptasýyna septigin tıgizedi. Ekochellendji uıymdastyrýǵa Astana qalasy Bilim basqarmasy qoldaý kórsetti. Ákeler odaǵy atynan alǵysymyzdy bildiremiz, – dedi Respýblıkalyq Ákeler odaǵynyń Astana fılıalynyń tóraǵasy Bekdaıyr Kúzembaı.
Bekdaıyr Kúzembaıdyń aıtýynsha, byltyr bul ıgi is-sharaǵa qalada 100 mektepten 1000 áke balasymen qatysqan.
Chellendjge qatysqan ákelerdiń biri – Nurjan Mashanov. Onyń uly qazir qaladaǵy T.Bıgeldınov atyndaǵy №1 mektep-lıtseıiniń 7-synybynda oqyp júr.
– Astanalyq ákelerdiń bir ýaqytta osyndaı ıgi iske atsalysýy bastamanyń aýqymyn ǵana emes, ákelerdiń yntymaǵy men jaýapkershiligin kórsetedi. Birge eńbek etý – áke men bala arasyndaǵy senimdi arttyrady. Sebebi bala ákesiniń is-áreketi arqyly eńbeksúıgishtikti úırenedi. Taza aýada qımyl-qozǵalys jasaý ımmýnıtetti nyǵaıtyp, fızıkalyq belsendilikti arttyrady, – dedi Nurjan Mashanov.
Ekochellendjdiń basty maqsaty – bilim berý uıymdary men ata-analar qaýymdastyǵy arasyndaǵy baılanysty nyǵaıtyp, tárbıe isindegi ákeniń rólin arttyrý.
Buǵan deıin elordada qar kúreý jumysyna 1,7 myńǵa jýyq arnaıy tehnıka shyǵarylǵanyn jazǵan bolatynbyz.