«Taza Qazaqstan» aktsııasy halqymyz túgeldeı qatysatyn aýqymdy sharaǵa aınaldy — Jeldibaı
ASTANA. KAZINFORM — Ekoaktsııa aıasynda 1,1 mln tonnadan asa qoqys jınalyp, 1,6 mln-ǵa jýyq aǵash egildi. Bul týraly Prezıdenttiń keńesshisi – Baspasóz hatshysy Rýslan Jeldibaı Telegram arnasynda jazdy.
Byltyr sáýir aıynan beri Memleket basshysynyń bastamasymen elimizde «Taza Qazaqstan» jalpyrespýblıkalyq aktsııasy uıymdastyrylyp keledi. Ekologııalyq ári áleýmettik mańyzy joǵary bul jobany jurtshylyqtyń bári, ásirese, jastardyń keńinen qoldaǵany qýantady.
— Búginde «Taza Qazaqstan» aktsııasy halqymyz túgeldeı qatysatyn aýqymdy sharaǵa aınaldy dep senimdi túrde aıtýǵa bolady. Aktsııaǵa barlyq óńir atsalysty. Jalpy, el aýmaǵynda 183 ekologııalyq aktsııa ótti. Oǵan 6,2 mıllıonnan astam adam qatysty, olardyń ishinde 229 myń erikti bar. Nátıjesinde 1,1 mıllıon tonnadan asa qoqys jınalyp, 1,6 mıllıonǵa jýyq aǵash kósheti egildi. Joba aıasynda aýqymdy jumys atqaryldy: aýlalar men aýmaqtar tazalandy («Taza ólke», World Clean Up Day, «Ónegeli urpaq»), aǵash kóshetteri egildi («Jasyl aımaq», Búkilqazaqstandyq orman egý kúni); mádenı-tarıhı eskertkishter aýmaǵy tazartyldy («Kıeli meken»); ózen-kólder men sý toǵandarynyń jaǵalaýlary retke keltirildi («Móldir bulaq», «Taza jaǵalaý»), — dep jazdy Jeldibaı.
Onyń sózinshe, ruqsat etilmegen qoqys alańdary aıtarlyqtaı azaıdy. Eger 2018 jyly 8,7 myń qoqys orny anyqtalyp, onyń 57 paıyzy joıylsa, 2024 jyly 4,8 myńǵa jýyq qoqys alańy belgili bolyp, 93 paıyzy joıyldy.
— Byltyr maýsym aıynda @TazaQazBot chat-boty iske qosyldy. Jurtshylyq bul platformaǵa ózderi kýá bolǵan keleńsiz faktilerdi habarlaı alady. Chat-bot iske qosylǵan sátten bastap 15806 ótinim túsip, onyń 14417-si oryndaldy. Qalǵan 302-si boıynsha tıisti jumystar qolǵa alynǵan. Bıyl «Taza Qazaqstan» aıasyndaǵy ekologııalyq is-sharalar naýryz aıynan bastap ońtústik jáne batys óńirlerde qolǵa alyndy. Búginge deıin uıymdastyrylǵan 11 tazalyq is-sharasyna 223 myńnan astam adam qatysty. Onyń ishinde 11,6 myńnan astamy — eriktiler. Nátıjesinde 7,6 myń tonna qoqys jınalyp, 385 myń gektar aýmaq tazartyldy. Shamamen 74,1 myń jasyl jelek otyrǵyzyldy. Munyń bári Prezıdent bastamasynyń ózekti ekenin kórsetip turǵany anyq. Memleket basshysy aıtqandaı, «Taza Qazaqstan» — bir rettik naýqan emes. Ol otandastarymyzdyń qorshaǵan ortaǵa kózqarasyn ózgertetin, óskeleń urpaqty týǵan jerge qurmetpen qaraýǵa tárbıeleıtin ıgi dástúrge aınalýǵa tıis, — dep túıindedi QR Prezıdentiniń keńesshisi.
Osyǵan deıin Memleket basshysy Qasym-Jomart Toqaev Býrabaıda ótip jatqan Ulttyq quryltaıdyń IV otyrysynda «Taza Qazaqstan» bastamasy týraly aıtty.