«Taza qala» jobasynyń ekinshi maýsymy bastaldy: Monoqalalarǵa basymdyq beriledi
ASTANA. KAZINFORM – Byltyr kópshiliktiń kóńilinen shyqqan «Taza qala» telejobasy ekinshi maýsymymen qaıta oraldy. Bul joly túsirilim toby monoqalalarǵa basa nazar aýdaryp, elimizdiń túkpir-túkpirindegi ekologııalyq ahýaldy tereńirek taldamaq. Sondaı-aq elimizdiń úsh megapolısi — Astana, Almaty men Shymkent nazarǵa iligedi.
Aıta keteıik, Prezıdent Teleradıokesheni Memleket basshysy Qasym-Jomart Toqaevtyń «Taza Qazaqstan» jalpyulttyq bastamasyn júzege asyrý maqsatynda «Taza qala» aýqymdy ekologııalyq jobasyn bastap, birinshi maýsymyn sátti aıaqtady.
Túsirilim toby Qazaqstannyń oblys ortalyqtary men megapolısterin túgel aralap, qalalardyń tazalyǵy men kórki týraly áńgimeledi. Jarty jylda jýrnalıster 30 myń shaqyrym jol júrip, aımaqtyń ekologııalyq ómirine belsendi qatysatyn 200-ge tarta keıipkermen tildesti.
«Taza qala» − eldegi ekologııalyq mádenıetti qalyptastyrýǵa baǵyttalǵan reportaj janryndaǵy 20 mınýttyq telejoba. Ony qos júrgizýshi júrgizedi, biri baǵdarlama formatyna sáıkes qalanyń jaqsy jaqtaryn kórsetse, ekinshisi – jaǵymsyz tustaryn aıtady. Shyǵarmashylyq top qalalardaǵy ekologııalyq keleńsizdikterdi, tazalyq talaptaryna saı kelmeıtin tustaryn synǵa alyp, jaýaptylardan talap etýdi jáne onyń nátıjesin kórsetýdi kózdeıdi.
Joba júrgizýshileri ár qalada birqatar krıterıı boıynsha zertteý júrgizedi, tazalyqqa jaýapty mamandarmen, qala turǵyndarymen, belsendilermen suhbat júrgizedi. Aýdan ortalyqtary men monoqalalardaǵy kóshe tazalyǵyna, kógaldandyrý, abattandyrý boıynsha kommýnaldyq qyzmetterdiń jumysyna basa mán beriledi. Sondaı-aq, qala turǵyndarynyń ekologııalyq mádenıeti men jaýapkershiligi nazarǵa alynady.
Al bıyl televızııalyq ekojoba ekinshi maýsymyn bastady. Jańa maýsymda elimizdegi oblys ortalyqtary emes, monoqalalarǵa basymdyq beriledi. Osylaısha 3 megapolıs, 20 monoqala jáne 1 qorytyndy baǵdarlama kórsetilimi josparlanǵan. Atap aıtqanda, monoqalalar arasynda Abaı, Aqsaı, Aqsý, Altaı, Balqash, Jańaózen, Jetiqara, Lısakovsk, Qarajal, Kentaý, Qulsary, Kýrchatov, Rıdder, Rýdnyı, Sátpaev, Stepnogorsk, Temirtaý, Hromtaý, Shahtınsk, Ekibastuz bar.
Ár shyǵarylymda táýelsiz sarapshylar beınematerıaldy qaraý arqyly pikir bildirip, ádil baǵasyn beredi. Saraptama nátıjesi 5 talap boıynsha 10 baldyq júıemen baǵalanady. Jobanyń jyl sońyndaǵy sońǵy shyǵarylymynda sarapshylardyń baǵalaýy boıynsha qalalardyń qorytyndy upaıy kórsetiledi.
Telejobanyń alǵashqy kórsetilimi 7 shilde kúni Astana qalasynan bastaý alady. Odan keıingi ár jańa shyǵarylym aptasyna 2 ret – dúısenbi jáne sársenbi kúnderi saǵat 19:30-da kórermen nazaryna usynylmaq.
Eske sala keteıik «Taza qala» jobasy jaqynda «Eń úzdik áleýmettik telejoba» nomınatsııasy boıynsha «Tumar-2025» ulttyq televızııalyq syılyǵyn jeńip alǵan edi.