«Adal gıd»: «Taza qala» telejobasy Qazaqstannyń týrıstik nysandaryn túsiredi
ASTANA. KAZINFORM — «Taza qala» ekologııalyq telejobasynyń komandasy túsirilim kestesin josparlap, jańa baǵyttardy tańdap jatyr. Bul — Jibek Joly arnasyndaǵy tanymal telebaǵdarlamanyń úshinshi maýsymy.
«Taza qala» — Prezıdent Teleradıokesheniniń tól jobasy, ol Memleket basshysynyń «Taza Qazaqstan» bastamasy aıasynda júzege asyrylyp jatyr.
Eske sala keteıik, birinshi maýsymda «Taza qala» túsirilim toby 30 myń shaqyrym jol júrip, respýblıkalyq mańyzy bar 20 qalany túsirdi. Alǵashqy maýsymda Astana men Almaty megapolısteri ásemdigi jáne tazalyǵymen kósh bastady. Ekinshi maýsym 20 monoqalanyń shynaıy tynys-tirshiligin kórsetip, 15 myń qazaqstandyqty aýqymdy ekologııalyq aktsııalarǵa jumyldyrdy.
2025 jyly «Taza qala» telejobasy «Úzdik áleýmettik joba» nomınatsııasy boıynsha ulttyq «Tumar» televızııalyq syılyǵynyń jeńimpazy atandy.
Jańa, úshinshi maýsymda júrgizýshiler — Ánýar Káribozov pen Qyrmyzy Jandos eldiń 24 týrıstik baǵytyna barady. «Adal gıd» formaty ózgerissiz qalady. Bir júrgizýshi tabıǵattyń sulýlyǵyna, óńirdiń qonaqjaılyǵyna jáne mádenı erekshelikterine zer salsa, ekinshisi — beıtarap synshyǵa aınalady.
«Taza qala» baǵdarlamasy sapasyz jol, joǵary baǵa, kúmándi servıs jáne eń bastysy — ekologııalyq máselelerdi obektıvinen tys qaldyrmaıdy.
Kórermender ishki týrızmniń boıaýsyz beınesin kóredi. Biz tek «ınstagramdyq» kórinisterdi ǵana emes, árbir saıahatshy betpe-bet keletin naqty qıyndyqtardy da kórsetemiz. Degenmen joba tek syn aıtyp qana qoımaı, shabyt beredi: onda sizder eko-eriktilermen, jaýapty bıznes ókilderimen jáne týǵan jerge degen súıispenshiligin ispen dáleldep júrgen ákimdiktermen tanysasyzdar.
«Taza qala» telejobasynyń mıssııasy — kórermenderge Qazaqstannyń týrıstik aımaqtarynyń jaǵdaıy men daıyndyǵy týraly shynaıy aqparat berý. Joba komandasy demalys qaı jerde óz qunyna laıyq ekenin jáne qaı jerde tazalyq pen jaılylyqty arttyrý úshin áli de jumys isteý qajet ekenin túsinýge kómektesedi.
Júrgizýshilerimiz Ánýar men Qyrmyzy saparǵa shyǵýǵa daıyn.
«Taza qala» jaqyn arada Jibek Joly telearnasynyń efırinde kórsetiledi!
