Taza energetıka jáne jańa qýat kózderi: Qazaqstan men Koreıa áriptestikti keńeıtpek
ASTANA. KAZINFORM - Qazaqstan men Koreıa arasyndaǵy strategııalyq áriptestikti nyǵaıtý aıasynda Energetıka mınıstri Erlan Aqkenjenov pen Koreıa Respýblıkasynyń Saýda, ónerkásip jáne tabıǵı resýrstar mınıstri Kım Chjon Kvannyń kezdesýi ótti.
Taraptar energetıka salasyndaǵy ekijaqty yntymaqtastyqtyń qazirgi jaı-kúıi men damý perspektıvalaryn talqylap, salanyń negizgi baǵyttary boıynsha áriptestikti odan ári keńeıtýge ózara múddeliligin rastady.
Kelissózder barysynda elektr energetıkasy salasyndaǵy ózara is-qımyldyń jáne birlesken ınvestıtsııalyq jobalardy iske asyrýdyń oń serpini atap ótildi. Energetıkalyq ınfraqurylymdy jańǵyrtý, jańa generatsııalyq qýattardy salý, zamanaýı tehnologııalardy engizý jáne energııamen jabdyqtaýdyń senimdiligin arttyrý máselelerine erekshe nazar aýdaryldy.
Sondaı-aq taza energetıka, jańartylatyn jáne balamaly energııa kózderi salasyndaǵy yntymaqtastyqty damytý, turaqty damý maqsattaryna qol jetkizý úshin tájirıbe men tehnologııalar almasý máseleleri qaraldy.
Kezdesý qorytyndysy boıynsha taraptar energetıkalyq qaýipsizdikti qamtamasyz etýge, tehnologııalyq damýǵa jáne Qazaqstan men Koreıa arasyndaǵy ekonomıkalyq baılanystardy nyǵaıtýǵa baǵyttalǵan ózara tıimdi jobalardy birlesip iske asyrý jumystaryn jalǵastyrýǵa daıyn ekendikterin rastady.
Osyǵan deıin Qazaqstan men Ońtústik Koreıa arasynda iskerlik baılanystar men týrızm damyp kele jatqany týraly jazdyq.
