Taza baldy qalaı ajyratýǵa bolady
ASTANA. KAZINFORM — Búgin — halyqaralyq aralar kúni. Osy merekege oraı «Búgin LIVE» stýdııasyna Óskemennen arnaıy kelgen áke men bala qonaq boldy.
Talǵat Ahmetjanov bal aralar bıznesin bastaýǵa uldarynyń sebep bolǵanyn aıtady.
— Bir kúni úlken ulym «Sábı» qorynyń baıqaýy týraly jarnamany kóripti. Túnde eki ulym bizden jasyryp, shaǵyn 1 mınýttyq rolık túsirip, baıqaýǵa jiberipti. Solaı qanshama qatysýshynyń arasynan ekeýi grantty utyp alypty. Ol rolıkte baldyń qandaı paıdasy bar ekenin aıtqan. Sodan bastap ara satyp alyp, solardan bal óndirip, qazir úlken dárejege jetip otyrmyz. Eń alǵash bastaǵanda alys-jaqyn aýyldaǵy shaǵyn jármeńkelerge qatysatynbyz. Keıinnen ózge óńirlerge shyǵa bastadyq, — deıdi omartashy áke.
Al onyń uly Tamırlan 10 jasynan bastap omartashylyqpen aınalysady. Alǵashynda ápkesi men jezdesiniń kásibine kómektesip bastaǵan ol birer jyldan soń bar jıǵan-tergenine aranyń 1 uıasyn satyp alypty.
— Men ózim 10 jasymnan aǵama kómektesip bastadym. Keıin 16 jasymda 1 uıa arany asyraı bastadym. Aqshamdy jınap, sol uıany aldym. Bul otbasylyq kásip dese de bolady. Qazirgi ýaqytta ákem ekeýmiz 400-ge jýyq aranyń uıasyn asyrap otyrmyz, — deıdi Tamırlan Ahmetjanov.
Qazir omartashylar otbasy júzdegen mıllıon arany asyraıdy. 400-ge jýyq ara uıasyn asyrap otyrǵan mamandar muny tabysy mol kásip dep otyr.
— Qazir aralar qystan shyqqan, kóktemgi ýaqyt bolǵandyqtan 1 uıada 30-40 myń aradan bolady. Al jazda, gúldiń tozańyn jınaýdy bastaǵan kezde aralardyń sany kóbeıedi. Ol kezde 1 uıadaǵy aranyń sany júz myńǵa deıin jetedi. Jalpy, 1 ara 1 aı ǵana ómir súredi. Ol óziniń búkil ǵumyrynda 1 shaı qasyq bal óndiredi. Al 1 uıadaǵy aralar 50-60 keli bal jınaıdy. Maýsym kezinde shamamen 10 tonnadan artyq bal jınalady, — deıdi omartashy.
Búginde kásipkerler baldyń 10-ǵa jýyq túrin óndiredi. Stýdııa qonaqtary paıdaly ónimderdi túr-túrge bólip, qalaı óndiretinderin túsindirdi.
— Aralardyń barlyǵy bir jerde turmaıdy. Biz olardy ártúrli bal jınaý úshin ártúrli jerge qondyramyz. Ol jerdegi gúldiń nári bitkennen keıin aralardy basqa jerge kóshiremiz. Máselen, kúnbaǵys jazdyń sońynda gúldeıdi. Biz aralarymyzdy kúnbaǵys alqabyna alyp baramyz. Ondaǵy aralar tek qana kúnbaǵystyq balyn jınaıdy. Basqa eshqandaı gúlge qonbaıdy. Qazirgi ýaqytta eń baǵaly baldar — mamyr baly men jońyshqa baly. Olar elıtalyq baldardyń qataryna jatady, — deıdi olar.
10 jylǵa jýyq ýaqyt boıy omartashylyqpen aınalysyp kele jatqan Tamırlan Ahmetjanov baldyń taza ne jasandy ekenin qalaı aıyrýǵa bolatynyn aıtyp berdi.
— Jazǵy ýaqytta baldar suıyq bolady. Taza baldy qanshalyqty bıikke kóterseń de, aǵysy juqaryp ketse de ol úzilmeıdi. Odan keıin baldar quıylǵanda birden batyp ketpeıdi, aldymen taý sekildi jınalady. Jáne úshinshisi — taza baldy qasyqpen ne basqa nársemen urǵan kezde ol eshqashan jan-jaqqa shashyramaıdy, - deıdi ol.
Aıta keteıik, buǵan deıin «Búgin LIVE» baǵdarlamasyna 76 jastaǵy horeograf qonaq bolyp, óz tájirıbesimen bólisken edi.