Taza aýyz sý máselesin jyldam ári sapaly sheshýge umtylsaq ıgi - O. Asanǵazy
ASTANA. 16 mamyr. QazAqparat - Taza aýyz sý máselesin jyldam ári sapaly sheshýge umtylsaq ıgi. Sondyqtan da, «Aqbulaq» baǵdarlamasy Úkimet basshysynyń tikeleı qadaǵalaýynda bolsa eken.
Búgin Májilistiń jalpy otyrysynda Úkimet basshysynyń atyna saýal joldaǵan depýtat Orazkúl Asanǵazy osylaı málim etti.
«Memlekettiń baılyǵy halyq bolsa, halyqtyń zor baılyǵy - densaýlyq. Al densaýlyq kepili - sapaly aýyz sý. Bul jaıynda birqatar sharalar atqarylyp jatyr, «Aqbulaq» baǵdarlamasy da qabyldandy. Alaıda halyq shólirkep taza sýdyń ornyna «dert tabar» sý iship otyrǵanda jaıbaraqattyq tanytyp, bólingen qarjynyń ornymen ıgerilmeýine áldeqandaı sebep-syltaý izdeýge esh haqymyz joq», - dedi depýtat. Onyń aıtýynsha, ótken onjyldyqtarda halyq asa zárý bolyp otyrǵan taza aýyz sý máselesine bólingen qarajattar ıgerilmeı qalǵan. Endeshe bul myńdaǵan adamdardyń kúndelikti qarapaıym qajettiligine, densaýlyǵyna qatysty, sol arqyly taǵdyryna da tikeleı áser etetin ózekti másele.
«Sondyqtan da taǵdyrly máseleni ári jyldam ári sapaly sheshkenimiz abzal. Bul kóptiń qamy bolǵan soń Úkimettiń mindeti. Búgin taza aýyz sýsyz, balalary sary aýrýǵa shaldyǵyp otyrǵan halyqqa «2013 jyly zertteledi, 2015 jyly bastalady» dep ýáj aıtý qıyn. Sondyqtan da, baǵdarlamany Úkimet basshysy naqty qadaǵalap, merziminen buryn oryndasa eken», - dedi O. Asanǵazy.
