Taza aýa jutýǵa zarmyz: Shymkentte turǵyndar tsement zaýytynyń jumysyna shaǵymdandy
ShYMKENT. KAZINFORM — Shymkenttegi tsement zaýytyna jaqyn turatyn turǵyndardy óndiris ornynan taraıtyn shań men shyǵaryndylarǵa qatysty ekologııalyq másele alańdatyp otyr.
Tsement zaýytyna qatysty másele Shymkent qalasynyń ákimi Ǵabıt Syzdyqbekovtiń Qarataý aýdany turǵyndarymen kezdesýinde kóterildi.
Turǵyndardyń aıtýynsha, úıleri óndiris ornyna jaqyn ornalasqan. Zaýyttan shyǵatyn shań-tozań saldarynan taza aýamen tynystaý qıyndaǵan. Ásirese, balalardyń densaýlyǵyna alańdaıtyndaryn jetkizdi.
— Tsement zaýytynyń túbinde turamyz. Kúnde jutatynymyz — tsement. Taza aýaǵa zar boldyq. Balalarymyz jıi jótelip, aýyryp qalady. Bul máseleniń kóterilip kele jatqanyna 20 jyldan asty. Buǵan kim jaýap beredi? — dedi jergilikti turǵyn Orazkúl Aqbergenova.
Qala ákimi bul máseleniń buǵan deıin de talqylanǵanyn aıtyp, aldaǵy ýaqytta taǵy qarap, sheshimin tabatynyn jetkizdi.
— Zaýyt qorshaǵan ortaǵa zııan keltirmeı jumys isteýi tıis. Eń bastysy — turǵyndardyń zardap shekpeýi. Kásiporynnyń jabyq kapsýla rejıminde jumys isteýin qamtamasyz etý qajet. Bul baǵytta tıisti jumystar júrgizilip jatyr, — dedi Ǵabıt Syzdyqbekov.
Máselege qatysty Shymkent qalasy boıynsha ekologııa departamenti túsinik berdi.
Departamenttiń málimetinshe, «Standart Tsement» JShS-de 2026 jylǵy 10 qyrkúıekte saǵat 04:40 shamasynda óndiristik jeliniń № 1 ýchaskesinde materıal qubyrynyń jarylýyna baılanysty apattyq jaǵdaı tirkelgen. Saldarynan qysqa ýaqytqa shańdaný baıqalǵan.
— Kásiporyn peshti toqtatyp, aqaýdy joıdy. Sonyń nátıjesinde materıaldyń tógilýi men shańdaný tolyq toqtatyldy. Qazirgi tańda jaǵdaı turaqty. Apattyq jaǵdaıdyń qaıtalanýyn boldyrmaý úshin tıisti sharalar qabyldanyp jatyr, — delingen vedomstvo usynǵan aqparatta.
Osydan keıin qorshaǵan ortanyń jaı-kúıin baǵalaý maqsatynda atmosferalyq aýa men topyraqtan synamalar alynyp, zerthanalyq zertteý júrgizilgen. 2026 jylǵy 16 qyrkúıektegi zertteý nátıjesine sáıkes, atmosferalyq aýa men topyraq quramyndaǵy zerttelgen kórsetkishter boıynsha belgilengen normatıvterden asý faktileri anyqtalmaǵan.
Buǵan deıin Shymkentte keıingi úsh jylda turaqty kózderden atmosferaǵa taralatyn lastaýshy zattardyń kólemi aıtarlyqtaı artqanyn habarlaǵan edik.
