Taza Astananyń artynda qansha adamnyń eńbegi tur
ASTANA. KAZINFORM — Elorda kósheleriniń tazalyǵy ózdiginen qalyptaspaıdy. Kún saıyn tań ata 1 500-ge jýyq kommýnaldyq qyzmetker men júzdegen arnaıy tehnıka qala kóshelerin tazalap, qoqys shyǵaryp, qoǵamdyq keńistikterdi kútip ustaıdy. Kazinform «Astana Tazalyq» mekemesiniń jumysy qandaı jáne Astananyń tazalyǵy qalaı qamtamasyz etiletinin zerdelep kórdi.
Astana kúni qarsańynda elorda erekshe qulpyrady. Taza kósheler, jýylǵan joldar, jınaqy saıabaqtar men qoǵamdyq keńistikter — turǵyndar úshin úırenshikti kórinis. Alaıda osy tazalyqtyń artynda táýlik boıy tynymsyz eńbek etetin myńdaǵan kommýnaldyq qyzmetkerdiń mańdaı teri jatyr.
Qazaqstanda sońǵy jyldary jumysshy mamandyqtarynyń bedelin arttyrýǵa erekshe kóńil bólinip keledi. Memleket basshysy jarııalaǵan Jumysshy mamandyqtary jyly aıasynda óndiris pen kommýnaldyq salada eńbek etetin mamandardyń qoǵamdaǵy róline nazar kúsheıdi. Al elordada qala tazalyǵy úshin jaýap beretin negizgi kásiporyndardyń biri — «Astana Tazalyq».
Tazalyqtyń artyndaǵy eńbek
Qazirgi tańda kásiporynda 1 500-ge jýyq qyzmetker eńbek etedi. Olar birneshe aýysymmen jumys istep, táýlik boıy qalanyń sanıtarlyq jaǵdaıyn qamtamasyz etedi.
— Mekeme teńgeriminde 419 arnaıy tehnıka bar. Olar maýsymǵa qaraı kóshelerdi jýý, joldardy sypyrý, qar shyǵarý, qoqys tasymaldaý jáne basqa da sanıtarlyq jumystarǵa paıdalanylady. Qalypty kúnderi kommýnaldyq qyzmetkerler táýligine orta eseppen 25–30 tonna qoqys shyǵarady. Al mereke kúnderi, demalys nemese qalada buqaralyq is-sharalar ótken kezde bul kólem 40 tonnaǵa deıin artady, — dedi «Astana Tazalyq» JShS baspasóz hatshysy Qymbat Baqytkeldi.
Jumys kólemin bir kúnniń ózinen-aq ańǵarýǵa bolady. Máselen, bıylǵy 1 maýsymda qala tazalyǵyn qamtamasyz etýge 271 arnaıy tehnıka men 549 jol jumysshysy jumyldyryldy. Onyń ishinde kúndizgi aýysymda — 153 tehnıka men 419 jumysshy, túngi aýysymda — 118 tehnıka men 130 jumysshy eńbek etti.
Tazalyq jumystary Esil, Nura, Almaty, Saraıshyq, Saryarqa jáne Baıqońyr aýdandaryndaǵy kóshelerde, aıaldamalarda, trotýarlar men qoǵamdyq keńistikterde júrgizildi.
Qysta qar, jazda shań
Kommýnaldyq qyzmettiń jumysy jyl mezgiline qaraı ózgerip otyrady.
Qys mezgilinde negizgi kúsh qar kúreý men shyǵarý jumystaryna jumyldyrylady. Ótken qysqy maýsymda kommýnaldyq qyzmetkerler 2,2 mıllıon tekshe metrden astam qardy qala syrtyna shyǵarǵan.
Kún saıyn bul jumystarǵa 600-den astam arnaıy tehnıka men 750-den astam jumysshy tartyldy.
Al kóktem men jazda kóshelerdi jýý, shań-tozańnan tazartý, aıaldamalardy kútip ustaý, qoǵamdyq oryndardy sanıtarlyq tazalaý jumystary úzdiksiz jalǵasady.
Tsıfrlandyrý tazalyqqa qalaı kómektesti?
Kommýnaldyq sala da tsıfrlyq tehnologııalardy belsendi engizip keledi.
«Astana Tazalyq» arnaıy tehnıkanyń jumysyn baqylaýǵa arnalǵan elektrondyq jol paraǵy júıesin iske qosty.
Bul júıe tehnıkanyń qozǵalysyn, atqarǵan jumys kólemin jáne janarmaı shyǵynyn naqty ýaqyt rejıminde baqylaýǵa múmkindik beredi.
Nátıjesinde:
- jol paraǵyn rásimdeý ýaqyty 10 mınýttan 1 mınýtqa deıin qysqardy;
- janarmaı shyǵyny 10 paıyzǵa deıin azaıdy;
- óndiristik protsesterdiń ashyqtyǵy artty.
Bul tájirıbege búginde elimizdiń basqa óńirleri ǵana emes, sheteldik uıymdar da qyzyǵýshylyq tanytyp otyr.
Tazalyq — tek kóshe sypyrý emes
«Astana Tazalyq» qyzmetkerleri ekologııalyq mádenıetti qalyptastyrý baǵytyndaǵy qoǵamdyq bastamalarǵa da belsendi qatysady.
Bıyl kásiporynnyń bastamasymen kásiptik-tehnıkalyq kolledj jáne Ulttyq shuǵyl medıtsına úılestirý ortalyǵymen birlesip aǵash otyrǵyzý aktsııasy uıymdastyryldy.
Ekologııalyq shara barysynda 100-den astam aǵash kósheti otyrǵyzylyp, úsh uıym arasynda qorshaǵan ortany qorǵaýǵa baǵyttalǵan yntymaqtastyq týraly memorandýmǵa qol qoıyldy.
Taǵy bir mańyzdy bastama — «Móldir bulaq» aktsııasy.
Kommýnaldyq qyzmetkerler men eriktiler qatysqan shara barysynda:
- 3 shaqyrym aýmaq tazartyldy;
- 57 shyny banka;
- 5 500-den astam temeki tuqyly;
- velosıped dóńgelegi men basqa da turmystyq qaldyqtar jınaldy.
Mundaı aktsııalar qoǵamda ekologııalyq mádenıetti qalyptastyrýǵa yqpal etedi.
Kommýnaldyq qyzmetkerlerge qandaı jaǵdaı jasalyp jatyr?
Sońǵy jyldary kásiporynda qyzmetkerlerdiń áleýmettik jaǵdaıyn jaqsartýǵa baǵyttalǵan jumystar qolǵa alynǵan.
Bir jyldyń ishinde jol jumysshylaryna arnalǵan 10 turmystyq jáne demalys bólmesi tolyq jańartylyp, paıdalanýǵa berildi.
Jańartylǵan bólmelerde demalýǵa, tamaqtanýǵa, kıim aýystyrýǵa jáne qysqa úzilis kezinde tynyǵýǵa barlyq jaǵdaı jasalǵan.
Sonymen qatar:
- qyzmetkerlerge arnalǵan 17 qyzmettik páter berildi;
- 80 oryndyq jataqhana paıdalanýǵa berildi;
- ıpoteka rásimdeıtin qyzmetkerlerdiń bastapqy jarnasynyń 50 paıyzyna deıin óteýge qoldaý kórsetilýde.
Bul sharalar kommýnaldyq saladaǵy mamandardyń áleýmettik qorǵalýyn kúsheıtýge baǵyttalǵan.
Úzdikter dál osy kásiporynda eńbek etedi
Kommýnaldyq qyzmetkerlerdiń kásibı deńgeıi túrli baıqaýlarda da dáleldenip keledi.
Bıyl ótken jumysshy mamandyqtarynyń qalalyq baıqaýynda «Astana Tazalyq» qyzmetkerleri eki negizgi nomınatsııa boıynsha jeńimpaz atandy.
Nurdáýlet Ábish — «Úzdik mehanızator — 2025», al Súndet Qoıbaǵarov — «Úzdik júk kóligi júrgizýshisi — 2025» ataǵyn ıelendi.
Qatysýshylar arnaıy tehnıkany basqarý, qaýipsizdik talaptaryn saqtaý, kúrdeli manevrlerdi oryndaý jáne jol qozǵalysy erejelerin bilý boıynsha synǵa tústi.
Bul jeńister kommýnaldyq sala mamandarynyń kásibı daıarlyǵynyń joǵary deńgeıin kórsetti.
Kózge kórinbeıtin eńbek
Qala turǵyndarynyń kóbi tańerteń taza kóshemen júrip, jýylǵan jolmen jumysqa barady. Biraq sol tazalyqtyń qalaı paıda bolǵany týraly kóp oılana bermeıdi.
Al onyń artynda tań qylań bere jumysyn bastaıtyn, aptap ystyqta da, aqtútek boranda da eńbek etetin júzdegen adamnyń eńbegi jatyr.
Kommýnaldyq qyzmetkerlerdiń jumysy kóbine kózge túse bermeıdi. Biraq olardyń eńbeginiń nátıjesi kún saıyn búkil qalaǵa kórinip turady.
Taza kósheler, jaıly qoǵamdyq keńistikter men kórikti elorda — sol eńbektiń naqty jemisi.
Buǵan deıin Astana kúnine oraı BAQ ókilderi arasynda baıqaý jarııalanǵanyn jazǵanbyz.
