Taza altynnan jasalǵan zergerlik buıymdy jasandy altynnan qalaı aıyrýǵa bolady

Onyń aıtýynsha, eń birinshi kezekte taýardyń sertıfıkattalǵandyǵy týraly tańbanyń bolýyna nazar salǵan jón. Eger mundaı tańba bar bolsa, onda ol taýardyń qajetti tekserýden ótkendigin bildiredi.

«Bazarda zergerlik buıym óte kóp. Biraq, jyltyraǵannyń barlyǵy altyn emes. Zergerlik buıym satyp alǵan kezde onyń sapasy men synamasy jaıynda oılaı bermeımiz. Eger taýar arzan bolsa, onda onyń ózi kúdik týdyrýy tıis. Taýarda 585 synamasy tursa, onda bul atalǵan buıymnyń 58,5 paıyzy taza altyn, al qalǵanynyń barlyǵy qospa ekendigin bildiredi», -  dedi Seısenbaev.

Biraq, sarapshy synamany qoldan basyp qoıý yqtımaldyǵy da joǵary ekendigin basa aıtty.

«Kez kelgen satyp alýshy úlkeıtkish áınek surap alyp, tańbasyn qaraı alady. Bizdiń tańbamyz latyn áripterimen kz dep belgilenip, synamasy sanmen aıqyn kórinip turýy tıis. Munan bólek, ókiletti organdy bildiretin alty qyrly belgi men barystyń beınesi bolýy qajet», - dedi ol.

Onyń sózine qaraǵanda taýar EAEO-ǵa kirmeıtin elderden ákelinetin bolsa, onda  kedende memlekettik ınspektor beretin memlekettik akti bolýy kerek.

«Bul taýar bizde tekserilip, qorytyndy beriledi. Oǵan deıin satylymǵa shyǵarylmaıdy. Kásipker memlekettik akti alǵannan keıin keden qyzmetine baryp, baj salyǵyn tóleıdi. Sodan keıin ǵana taýar satylymǵa shyǵarylady. Eger satýshyda ne memlekettik akti, ne salyq tólegendigin dáleldeıtin qujat bolmasa, onda taýar zańsyz ákelingen degen sóz», - dedi Erbol Seısenbaev.

Sonymen qatar sarapshy baǵaly tastar (brıllıant, rýbın) da tabıǵı jáne jasandy bolatyndyǵyn atap ótti.

«Jańa zańǵa eger tas jasandy bolsa, onda bırkada kórsetilýi tıistigi týraly jeke tarmaq bar. Buǵan deıin mundaı bolmaǵan edi. Máselen, jasandy jáne tabıǵı rýbın tasy bar birdeı saqınalardyń baǵasynda aıtarlyqtaı aıyrmashylyq bar», - dep túsindirdi ol.