Taıvanda nóser saldarynan jaraqat alyp, kóz jumǵandar sany artty

ASTANA. KAZINFORM — Taıvannyń ortalyq jáne ońtústik aımaqtaryna bir apta boıy toqtaýsyz jaýǵan kúshti jańbyrdyń saldarynan 4 adam qaza taýyp, 74 adam jaraqat aldy, al 3 adam habarsyz joǵalyp ketken, dep habarlaıdy Sınhýa.

Bul týraly araldyń órt sóndirý qyzmeti málim etti.

Taıvanda 108 baqylaý stantsııasynda táýligine 200 mm-den astam jaýyn-shashyn tirkeldi. Gaosıýn qalasynda bir apta ishinde jaýyn-shashyn mólsheri 2759 mm-ge jetip, bul araldaǵy jyldyq ortasha kórsetkishten (2500 mm) asty.

Tótenshe jaǵdaılar ortalyǵynyń málimetinshe, 3 tamyzdaǵy jaǵdaı boıynsha 5795 adam evakýatsııalandy, 140 jol men týnnel jabyldy, taýlarda 124 laı kóshkini boldy. Elektr qýatynan júzdegen úı ajyratyldy, kóptegen aımaqtarda laı kóshkinine baılanysty «qyzyl» eskertý jarııalandy.

Meteorologtardyń boljamy boıynsha, ortalyq jáne ońtústik Taıvanda jańbyr dúısenbi kúni de jalǵasýy múmkin. Osyǵan baılanysty Gaosıýn, Taınan jáne Pındýn qalalarynda jumys pen oqý toqtatyldy.

Budan buryn Taıvanda tolassyz nóser jaýynnan 3 adam qaza tapqanyn jazdyq.