Taıvanda «Champı» taıfýnyna baılanysty júzdegen áýe reısi toqtatyldy
ASTANA. KAZINFORM – «Champı» taıfýny Taıvanda júzdegen áýe reısiniń toqtatylýyna jáne keshigýine sebep boldy. 24 qazanda birneshe baǵyt boıynsha parom qatynasy da ýaqytsha toqtatyldy. Bul týraly Focus Taiwan habarlady.
Taıfýnnyń jaqyndaýyna baılanysty áýe kompanııalary halyqaralyq jáne ishki reıster kestesine ózgerister engizgen.
Atap aıtqanda, Starlux Airlines áýe kompanııasy Taıvannan Indonezııa men Japonııaǵa, sonyń ishinde Okınava men Sımodzısıma aralyna qatynaıtyn reısterin toqtatty. Fılıppınge, Vetnamǵa jáne Japonııanyń Kobe qalasyna ushatyn reıster de keshiktirildi.
Sonymen qatar kompanııa 24 qazanda Taıchjýn áýejaıynan oryndalatyn jáne osy áýejaıǵa keletin barlyq reısin toqtatty. Reısteri bolmaı qalǵan jolaýshylar úshin Tokıodan Taıvanǵa qosymsha eki reıs uıymdastyrý josparlanǵan.
Tigerair Taiwan áýe kompanııasy da Japonııanyń Tokıo, Osaka, Sapporo jáne Fýkýoka qalalaryna ushatyn birqatar reısin toqtatty. Ońtústik Koreıanyń Chedjý aralymen áýe qatynasy da shekteldi. Japonııa men Ońtústik Koreıanyń basqa qalalaryna, sondaı-aq Vetnam men Taılandqa qatynaıtyn keıbir reıster keıinge shegerildi.
EVA Air kompanııasy senbi kúni túske deıin Taoıýan halyqaralyq áýejaıy men Taıbeı-Sýnshan áýejaıynan oryndalatyn birqatar reısin toqtatatynyn habarlady. China Airlines jolaýshylardy reısterdiń toqtatylýy, keshigýi jáne ushý ýaqytynyń ózgerýi múmkin ekenin eskertti.
Qolaısyz aýa raıy ishki áýe qatynasyna da áser etti. Uni Air kompanııasy Taıbeı, Taıchjýn, Tszıaı, Taınan jáne Gaosıýn qalalarynan oryndalatyn birneshe reısin toqtatty. Kompanııanyń Matszý araldaryna qatynaıtyn barlyq reısi de toqtatyldy.
Mandarin Airlines Taıvan qalalary men jaqyn mańdaǵy araldar arasyndaǵy keıbir reısterin toqtatty. Odan keıingi ózgerister aýa raıyna baılanysty bolady.
Áýe qatynasynan bólek, 24 qazanda Taıvan men Matszý, Sıaolıýtsıý jáne Jasyl aral arasyndaǵy baǵyttardy qosa alǵanda, alty baǵyt boıynsha parom qozǵalysy toqtatyldy.
Bılik pen áýe tasymaldaýshylary jolaýshylardy áýejaılar men teńiz porttaryna shyqpas buryn reıster týraly sońǵy aqparatty tekserýge shaqyrdy.
Eske sala ketsek, buǵan deıin «Dýtszıýan» taıfýny Japonııadaǵy kólik qatynasyna eleýli kedergi keltirgen bolatyn. Qolaısyz aýa raıyna baılanysty Japan Airlines shamamen 120 ishki reısin, al All Nippon Airways 140-qa jýyq reısin toqtatqan. Sondaı-aq keıbir temirjol jelilerinde poıyz qozǵalysy ýaqytsha toqtatylǵan edi.
