Taıvandaǵy jer silkinisinde 132 adam úıindi astynda qaldy

ASTANA. QazAqparat - Buǵan deıin Taıvandaǵy Taınan qalasynda jer silkingeni týraly habarlanǵan bolatyn. Sońǵy aqparattarǵa súıensek, zilzalada qıraǵan 17 qabatty ǵımarat úıindisi astynda kem degende 132 adam qaldy, dep habarlady «VVS» agenttigi.

Kóp qabatty turǵyn úıde 96 páter bolǵan, onda 256 adam qonystanǵan. Jer asty dúmpýinen úı ekige qaq aıyrylǵan, onyń joǵarǵy bóligi jerge qulady.
Qutqarýshylar habarlaǵandaı, qazir olar bergi jaqtardy ǵana teksere aldy. Al kúrdeli oryndarǵa jetý úshin aýyr qurylys tehnıkasy qajet.
Sońǵy derekterde 18 adam jer silkinisiniń qurbany bolǵany, 500-ge jýyq adam jaralanyp, 300-den astam adam qutqarylǵany aıtylǵan.