Taıvandaǵy týrnırde olımpıada joldamasyna talasatyn qazaqstandyq balýandar belgili boldy
ALMATY. 14 sáýir. QazAqparat - Qytaıdyń Taıvan aralynda 27-29 sáýirde erkin kúresten, áıelder kúresinen jáne grek-rım kúresinen lıtsenzııalyq álemdik týrnır ótedi.
Onda erkin kúresten el namysyn 84 keli salmaqta Ermek Baıdýashev, áıelder kúresinde 55 kelide Aıjan Smaǵulova qorǵaıdy. Al grek-rım kúresinde bapkerler 55 jáne 96 keli salmaq dárejeleri boıynsha Ashat Qudaıbergenov pen Jasulan Sydyqovqa senim bildirip otyr.
Buǵan Olımpıada joldamasyn 30 naýryz ben 2 sáýir aralyǵynda Astanada ótken Azııalyq irikteý týrnırinde erkin kúresten Aqjúrek Tańatarov (66 kg) pen Marıd Mýalımov (120 kg), áıelder kúresinen Elena Shalygına (63 kg), grek-rım kúresinen Darhan Baıahmetov (66 kg) pen Danııal Gadjıev (84 kg) ıe bolǵan edi. Mundaı mártebege onyń aldynda 2011 jyly Ystambulda bolǵan Álem chempıonatynda erkin kúresten Dáýlet Nııazbekov (55 kg), Dáýren Jumaǵazıev (60 kg), Abdýlhákim Shapıev (74 kg), Taımýraz Tıgıev (96 kg) qol jetkizgen bolatyn. Al áıelder kúresine Juldyz Eshimova (48 kg) men Gúzel Manıýrova (72 kg), grek-rım kúresinen Almat Kebisbaev (60 kg), Ashat Dilmuhamedov (74 kg), Nurmahan Tinálıev (120 kg) ıe boldy. Endi qurama qorjynyna túspegen ózge 4 joldamaǵa balýandar Qytaıda talasyp kóredi. Onda qol jetpegenin 4-6 mamyrda Fınlıandııanyń Helsınkı qalasynda ótetin aqtyq irikteý týrnırinde sarapqa salatyn bolady.
