Taıvanda jappaı qarsylyq aktsııalarynan keıin aıaqtalýǵa jaqyndaǵan AES qurylysy toqtatyldy
ASTANA. QazAqparat - Taıvan aralynyń ókimet oryndary jańa tórtinshi atom elektr stansasyn salý jónindegi barlyq jumystardy toqtatty. Buǵan Taıbeı ortalyǵynda jınalǵan ondaǵan myń adamyyń buqaralyq sherýi sebep boldy. Sherýshiler qaýipsizdik turǵysynan aıaqtalyp qalǵan jobadan bas tartýdy talap etti, dep habarlady ITAR-TASS.
Taıvan ákimshiligi aqyrynda «Lýnmen» AES-iniń taǵdyry referendýmda sheshiletinin jarııalady. Óz kezeginde Taipower energetıkalyq korporatsııasy jobany odan ári «súrleý» ony bankrotqa ákelip soqtyratynyn eskertti. AES qurylysyna qazirdiń ózinde jalpy somasy 93 mlrd. AQSh dollaryna jýyq qarjy jumsaldy.
Jańa stansa kóp jyldardan beri alaýyzdyqtar men saıası daý-damaıdyń nysanasyna aınaldy. Bul osydan 20 jyl buryn maquldanǵan jobany qarjylandyrýdy jáne júzege asyrýdy únemi tejep keldi. Únemi keıingi ysyryla kelip, AES-ti kommertsııalyq paıdalanýǵa berý 2016 jylǵa belgilengen bolatyn. Qazir onyń birinshi energoblogy iske qosýǵa daıar bolyp ta qaldy.
Alaıda sońǵy kezderi halyqtyń qarsylyǵy shuǵyl ýshyǵyp ketti. Japonııadaǵy «Fýkýsıma» AES-indegi apat Taıvannyń 23 mıllıondyq turǵynynyń eleýli alańdaýshylyǵyn týǵyzdy. «Lýnmen» stansasy Taıbeı qalasynyń mańynda araldyń soltústik-shyǵysyndaǵy seısmıkalyq qaýipti aımaqqa ornalasqan.
